Үлкен Нарын орта мектебінің ата-аналары мектеп асханасындағы тамақтан құрт шыққанын айтып, дабыл қақты, деп хабарлайды F16.kz.
Сорпадан шыққан құртты балалар суретке түсіріп, ата-аналарына жіберген.
Бұл бірінші жағдай емес. Бұған дейін балалар тауып алғанда оның тамаққа қосатын дәмдеуіш екенін айтқан. Бізде де, балаларда да ешқандай дәлел болмағандықтан ештеңе істей алмадық. Осы жолы сорпадан шыққан құртты көрген балалар бірден суретке түсіріп алған Шара қолдануды сұраймыз! – дейді ата-аналар.
Облыстық қоғамдық кеңес бұл жағдайда алаңдаушылық білдіріп отыр. Кеңес мүшесі Аяужан Әшімова облыстық және аудандық қоғамдық кеңестерді мектеп асханаларындағы тамақ сапасын тексеруге шақырды.
Біздің ұрпағымыз чипсы жеп, кола ішіп, денсаулығын құртпасын деп, ыстық тамақ жесін дейміз. Сондағы беріп отырған ыстық тамағымыз осы ма?! Кәсіпкерлікпен айналысып отырған адам неге ұялмайды? Кәсіпкерлікті қорғау мақсатында бейберекет тексерулер тоқтатылған. Бірақ сонда қол жеткізгеніміз осы ма екен? Тамақтан құрт шыққаны, жалпы осы кәсіпкердің жұмысындағы жүйелі кемшіліктен хабар береді деп білемін. Осы орайда облыстық қоғамдық кеңес мүшелері, аудандық қоғамдық кеңестерді балаларымыздың тамағының сапасын тексеруге шақырамын, — деп жазды ол әлеуметтік желіде.
