Самар ауданында балық және ауыл шаруашылығы бойынша бірқатар ауқымды жобалар жүзеге асырылмақ. Бұл туралы аудан әкімі Серік Жеңісов өңірлік коммуникациялар қызметі алаңында өткен баспасөз брифингінде айтты, деп хабарлайды F16.kz.
Естеріңізге сала кетейік, қыркүйек айында облыс орталығында «Altay invest-2025» халықаралық форумы өтіп, өңірге 740 млрд теңгеден астам инвестиция тартылған. Шетелдік инвесторлармен меморандумға қол қойғандар қатарында Самар ауданы да бар.
800 миллион теңгеге жем зауытын іске қосу, 700 миллион теңге көлемінде балық өңдеу кешенін кеңейту және 300 миллион теңгеге балық жемін өндіру бойынша жобалар ұсынылып, меморандумға қол қойдық, — дейді аудан әкімі.
Қазіргі күні инвесторлардың бірі қаржы бөліп, жұмысты бастап кеткен. Балық өңдеу зауытына арнайы құрылғылар Қытайда жасалып жатқан көрінеді.
600 млн теңге қаржы бөлінді. Сол құрылғыларды қай жерге, қалай орнатуды зерттеп, қарау үшін Германиядан арнайы маман келді. Бүгінде жұмыс жүріп жатыр. Жаңа кәсіпорын еуропалық стандартта жұмыс істейді. Себебі, өнімдерді болашақта Еуропаға экспорттауды жоспарлап отырмыз, — деді Серік Жеңісұлы.
Инвестиция тартылған жобалардың тағы бірі – жем өңдеу зауыты. Ауқымды жоба жүзеге асса, аудан экономикасына айтарлықтай әсер бермек.
Қытайлық инвестор бүгінде қаржы бөлуге дайын. Біз қазір шаруа қожалықтарымен жұмыс істеп жатырмыз. Зауыт бой көтеретін болса, біз кем дегенде 10 мың гектар жерде жемшөп дақылдарын егуіміз керек. Сонымен қатар, инвесторлар бізге көңілге қонымды ұсыныс білдіріп отыр. Біз жем салып, зауыттан өңдесек, олар өнімді Қытайға алдырып отырмақ, — деп атап өтті аудан әкімі.
