Сағадат Нұрмағамбетов атындағы орта мектепте «Жас сарбаз» сыныбының оныншы легі салтанатты түрде әскери ант қабылдады. Биылғы ант қабылдау рәсімі жылдағыдан ерекше. Себебі жас патриоттардың сыныбы құрылғанына 10 жыл толды, деп хабарлайды F16.kz.
Ант қабылдау рәсімі – жас сарбаздар үшін елге қызмет етудегі алғашқы әрі жауапты қадам.
Салтанатты шараға мектеп әкімшілігі, ұстаздар мен ата-аналар қатысты.
«Жас сарбаз» сыныбы он жыл ішінде талай елжанды, тәртіпті, жауапкершілігі жоғары жасөспірімдерді тәрбиелеп шығарды, — дейді ШҚО «Жас Сарбаз» қозғалысының төрағасы Дәурен Шоматов.
Оныншы лектің оқушылары көпшілікке саптық дайындықтарын көрсетіп, Отанға адал болуға, ел тыныштығын қорғауға, әскери тәртіпті сақтауға және мемлекет заңдарын құрметтеуге ант берді.
