Мемлекеттік бағдарламалардың арқасында құрылғанына көп болмаған Самар ауданына жас мамандар көптеп келіп жатыр. Бұл туралы аудан әкімі Серік Жеңісұлы жастар форумында айтты, деп хабарлайды F16.kz.
Өңірде еріктілер қозғалысын дамытуға атсалысып жүрген самарлық белсенді жастар форумда бас қосты. Әр ауыл, әр саладан келген жастар аудан әкімімен ашық пікір алмасып, жастар саясатын жүргізудің тиімді жолдарын талқылады. Тұрғын үй, жұмыспен қамту және жастардың болашағына қатысты өзекті мәселелер әңгімеге арқау болды. Аудан әкімі мемлекет тарапынан жастарды қолдауға бағытталған бағдарламаларға тоқталды.
Жастардың ауылда қалып, еңбек етуіне жағдай жасау үшін әлі де атқарылатын жұмыс көп екенін. Дегенмен бүгінде мемлекеттік бағдарламалардың арқасында ауданға жас мамандар келіп жатыр. Алдағы уақытта коворкинг-орталық ашу, қоғамдық кеңістіктерді дамыту, саябақтар мен демалыс аймақтарын абаттандыру жоспарланған. Бірлескен күш-жігердің арқасында жастармен бірге ауқымды жұмыстар атқарамыз деп ойлаймын, – деді Серік Жеңісұлы.
Форумда ауданның дамуына үлес қосып жүрген жастарға арнайы марапаттар табысталды.
Самарға сонау шекарадағы Зайсан ауданынан келіп жұмыс істеп жатырмын. Форумда өзекті мәселелер талқыланды. Шынымен де, жастардың жағдайы басты назарда болу керек. Ауылда жастардың тұрақтап қалуына мемлекет тарапынан жағдай жасалып жатқаны белгілі. Кәсіпкерлік болсын, баспана жағынан болсын. Көп жағдайда жастар ауыл мен қаланы салыстырып, қалаға көшіп жатады. Бұл үрдісті тоқтату керек. Ол үшін жастар бос уақытын өткізетін орындар ашу керек. Бастапқыда мен де қиналдым. Уақыт өте үйрендім. Қазір ауданымызда үлкен жобалар жүзеге асып жатыр. Бұл жұмыстар ауылдық жерлерде халықтың тұрақтап қалуына әсер етеді, – деді Самар аудандық ТЖБ маманы Ұлан Білімбекұлы.
Аудан әкімі жастар айтқан ұсыныстар мен өтініштер алдағы уақытта жүзеге асырылатынын атап өтті.
