Шығыс Қазақстан облысының мемлекеттік сәулет-құрылыс бақылау басқармасы үлескерлік құрылысқа қатысты тұрғындарға пайдалы ақпарат жариялады.
Бүгінде елімізде тұрғын үй құрылысына үлестік қатысу заңмен қатаң реттеледі. Қолданыстағы талаптарға сәйкес, құрылыс компаниялары азаматтардың қаражатын тек үш жағдайда тарта алады: жергілікті атқарушы органның рұқсаты болғанда, Қазақстан тұрғын үй компаниясы кепілдік бергенде немесе екінші деңгейлі банк жобаға қатысқан кезде.
Мамандардың айтуынша, тәжірибеде бұл талаптарды сақтамай, үлескерлер қаражатын заңсыз тартатын жағдайлар әлі де кездеседі. Мұның соңы ауыр болуы мүмкін: алданған үлескерлер саны артады, құрылыс нысандары аяқталмай қалады, қоғамда резонанс туындайды.
Сондықтан рұқсат құжаттарынсыз жасалған кез келген брондау немесе келісімшарт заңсыз болып есептеледі. Азаматтарға құрылыс компаниясымен келісім жасамас бұрын барлық құжатты мұқият тексеру ұсынылады.
Қазір Өскеменде заң талаптарына сәйкес жүзеге асырылып жатқан бірқатар тұрғын үй кешені бар. Олардың қатарында «Asyltas» (екінші деңгейлі банк қатысуымен), «Orda», «Tumar Towers Oskemen», «Айналайын», «Belgravia», «BS Holding Easton» (жергілікті атқарушы органның рұқсатымен), сондай-ақ «ASYLYM» және «Золотой квадрат» (Қазақстан тұрғын үй компаниясы кепілдігімен) жобалары аталады.
Құрылыс нысанының заңдылығын тексеру үшін азаматтар eLicense.kz порталы арқылы компанияның БСН-ін енгізіп, қажетті ақпарат ала алады. Сонымен қатар Homeportal.kz платформасында тұрғын үй жобалары туралы мәлімет жеткілікті.
Тұрғын үй сатып алу – аса жауапты шешім. Сондықтан қаржы салмас бұрын барлық құжаттың заңдылығына көз жеткізу қажет, — деп жазды мемлекеттік сәулет-құрылыс бақылау басқармасы.
