Үкімет отырысында Премьер-министр Олжас Бектенов отандық инновацияларды дамыту үшін ұзақмерзімді инвестиция тарту мәселесін көтерді. Ол ғылым саласына қаржы құюды ынталандыратын нақты тетіктерді әзірлеу қажеттігін атап өтті, деп хабарлайды F16.kz.
Премьер-министрдің айтуынша, бүгінде инновациялық жобаларға қомақты қаржы салуға дайын кәсіпкерлер саны аз. Мұндай жағдай тек Қазақстанға тән емес, басқа елдерде де байқалады. Осыған байланысты мемлекет тарапынан бизнесті қолдау және ынталандыру шараларын күшейту қажет.
Инвестиция тартуды ынталандыру керек. Қазір инновацияға ірі көлемде қаржы салатын кәсіпкерлер көп емес. Сондықтан бұл бағытта нақты қолдау тетіктері болуға тиіс, – деді Үкімет басшысы.
Осы орайда Премьер-министр Ғылым және жоғары білім министрлігіне ұзақмерзімді инвестиция тартудың жаңа құралдарын әзірлеуді тапсырды.
Өз кезегінде Ғылым және жоғары білім министрі Саясат Нұрбек қазіргі қолданыстағы қолдау шаралары туралы баяндады. Оның ішінде ғылыми жобаларды коммерцияландыруға арналған гранттар, ғылыми-зерттеу және тәжірибелік-конструкторлық жұмыстарға (ҒЗТКЖ) берілетін салықтық жеңілдіктер, эндаумент-қорлар және басқа да механизмдер бар.
Жиын барысында инновацияны дамыту мен ғылымға инвестиция тарту мәселесі алдағы уақытта да Үкіметтің басты назарында болатыны атап өтілді.
