Шығыс Қазақстан облысының Глубокое ауданында мүлік иелері бірлестігін (МИБ) құру жұмысы белсенді жүргізіліп жатыр. Қазірдің өзінде Глубокое және Белоусовка кенттерінде, Опытное поле ауылында тұрғындар өз үйін дербес басқаруға көшіріп, алғашқы нәтижелерін көре бастады.
Тұрғындардың айтуынша, жаңа басқару нысаны ортақ мүлікке деген жауапкершілікті арттырып, абаттандыру мәселесін жедел шешуге мүмкіндік берген. Подъездер мен аулаларда тазалық сақталып, қызмет көрсету сапасы жақсарған.
МИБ жүйесі тұрғындарға қаржы шығынын бақылауға, жөндеу жұмысын жоспарлауға және маңызды шешімдерді қабылдауға жол ашады. Бұл өз кезегінде өмір сүру жайлылығын арттыруға ықпал етеді.
Сонымен қатар кейбір көпқабатты үйлерде басқару нысаны әлі анықталмаған. Басқарушы компаниялардың болмауы ортақ мүлікті күтіп-ұстау мәселелерін қиындатты. Осыған байланысты тұрғындармен түсіндіру жұмысы жүргізіліп, әдістемелік көмек көрсетіліп жатыр.
Ауданда МИБ құру жұмысы алдағы уақытта да жалғасады. Мамандар бұл бастама тұрғын үй қызметінің сапасын арттырып, басқарудың ашықтығын қамтамасыз етеді деп отыр.
