Биыл Самар ауданында санитарлық тазалық пен көгалдандыру жұмысына ерекше көңіл бөлініп отыр, деп хабарлайды F16.kz.
Көктем шыққалы ауданның әр ауылында экологиялық мәдениетті арттыруға бағытталған «Таза Қазақстан» акциясы аясында санитарлық тазарту жұмысы тұрақты түрде жүргізіліп келеді. Соның нәтижесінде көшелер мен елді мекендер маңынан 21 тоннадан астам қоқыс шығарылған. Одан бөлек өзен-көлдердің жағалауы тазартылып, көшеттер егілді. Аудандық және облыстық маңызы бар жол учаскелері де ретке келтірілген.
Аудан әкімдігінің мәліметінше, жазғы маусымда жол, тротуар және көпірді жуу жобасы іске қосылған. Бұл мақсатта мердігер ұйыммен арнайы келісімшарт жасалған.
Ауылдардың тазалығы — тұрғындардың мәдениеті мен жауапкершілігінің көрсеткіші. Бұл жұмыстарға мемлекеттік мекемелермен қатар жергілікті тұрғындардың да белсене қатысып жатқаны қуантады. Олар сенбілікке шығып, өз ауласын көріктендіруге үлес қосып жатыр, — деді аудан әкімі Серік Жеңісов.
Биыл аудан әкімдігі Самар ауылындағы және өзге ауылдардағы негізгі көшелер мен саябақтарды гүлмен көмкеруді жоспарлап отыр. Сондай-ақ кәсіпкерлерге өзіне тиесілі нысандардың маңын көгалдандыру және безендіру жұмысына белсенді қатысу ұсынылған.
