Өскеменде әскери-қолданбалы спорт түрлерінен ХХІІІ спартакиада аясында армиялық қоян-қолтық ұрыстан «Шығыс» өңірлік қолбасшылығының чемпионаты өтті, деп хабарлайды F16.kz.
Өскемен гарнизонының спорт кешенінде ұйымдастырылған жарысқа Өскемен, Аягөз, Үшарал және Абай өңірлік гарнизондарының әскери бөлімдерінен келген 10 команда, 100-ге жуық әскери қызметші қатысты. Жыл сайын дәстүрлі түрде өтетін бұл дода әскери қызметшілердің жауынгерлік шеберлігі мен дене дайындығын шыңдауға бағытталған.
Турнирдің ашылу салтанатында ұйымдастырушылар жарыстың маңыздылығына тоқталып, мұндай сайыстардың әскери қызметшілердің кәсіби даярлығын арттырудағы рөлін ерекше атап өтті.
Жарыстың басты мақсаты – жеке құрамның жауынгерлік әзірлігін жетілдіру, дене дайындығын нығайту және әскери рухты көтеру. Біздің гарнизонда армиялық қоян-қолтық ұрысқа ерекше көңіл бөлінеді. Бұл спорт түрі жылдан жылға дамып, оған қызығушылық танытатын әскери қызметшілер саны артып келеді, – деді бөлімше командирі сержант Санат Казбеков.
Жарыстың алғашқы іріктеу белдесулерінен бастап финалдық кездесулерге дейін тартысты өтті. Әр салмақ дәрежесінде сынға түскен жауынгерлер өздерінің жоғары шеберлігін, төзімділігі мен тактикалық даярлығын көрсетті.
Чемпионат қорытындысы бойынша командалық есепте 27943 әскери бөлімі (Өскемен) жеңімпаз атанды. Екінші орынға 30217 әскери бөлімі (Семей) тұрақтаса, үздік үштікті 44736 әскери бөлімі (Семей) түйіндеді.
Жүлдегерлерге арнайы диплом, медаль және кубоктар табысталды.
