Өскеменде ер адам он күн бойы жергілікті шағын дүкендердің бірін тонап келген. Ол ондаған қорап шоколадты қолды қылған, деп хабарлайды F16.kz.
ШҚО полиция департаменті баспасөз қызметінің мәлімдеуінше, дүкендегі тауарлардың жоғалғаны бірден байқалмаған. Бейнебақылау камерасының жазбасын тексергеннен кейін сауда орнының әкімшісі полицияға жүгінген. Тәртіп сақшылары жүргізген тексеру барысында белгісіз азамат шамамен бір жарым апта бойы шағын-маркетке келіп, сөредегі тауарларды жасырын түрде алып шығып отырған. Ұрының таңдауы да ерекше екен. Ол 10 күн ішінде шамамен 80 қорап «Merci» кәмпитін, 25 дана «Қазақстан» шоколадын, бірнеше банка кофе мен сусабын флакондарын жымқырған. Дүкенге келтірілген жалпы шығын көлемі 300 мың теңгеге жуық.
Үлбі полиции бөлімінің қызметкерлері тәттіге әуес күдіктінің жеке басын дереу анықтады. Ол тұрақты мекенжайы жоқ 33 жастағы ер адам болып шықты.
Қазір сотқа дейінгі тергеу амалдары жүргізіліп жатыр. Полиция мұндай «тегін сауда» үшін қылмыстық жаза қарастырылғанын ескертеді.
