Өскемен тұрғындары мен қонақтарына нағыз тарихи сәттің куәсі болатын бірегей мүмкіндік туып тұр. Биылғы мамыр мерекелері аясында Арбатта әскери оркестрдің сүйемелдеуімен ән шырқалады. Бұл жолы сахнаға кәсіби мамандар емес, жүрегінде Отанға деген сүйіспеншілігі бар кез келген азамат шыға алады, деп хабарлайды F16.kz.
Алдағы 5 мамырда Ұлттық ұланның «Шығыс» өңірлік қолбасшылығына қарасты 5518 әскери бөлімі ерекше форматта музыкалық бағдарлама ұсынады. Шараның басты ерекшелігі — ашық микрофон форматында өтуі. Бұл дегеніміз, кез келген тұрғын оркестрдің кәсіби сүйемелдеуімен соғыс жылдарының әйгілі әндерін көпшілік алдында орындай алады.
Ұйымдастырушылардың айтуынша, игі бастама тыңдарман мен орындаушының арасын жақындатып, өткен дәуірдің рухын сезінуге, тарихи жадыны жаңғыртуға әсер етеді. Бұл күнгі кеште халық жадында мәңгі сақталған, ерлік пен сағынышқа толы туындылар шырқалады. Атап айтқанда, «Жеңіс күні», «Катюша», «Смуглянка», «Көк орамал» (Синий платочек), «Славян қызының қоштасуы» және тағы басқалар.
Мерекелік шара Жеңіс күні қарсаңында ардагерлердің ерлігін дәріптеу және жастарды патриоттық рухта тәрбиелеу мақсатында ұйымдастырылады.
Уақыты: 5 мамыр, сағат 16.00–18.00
Орны: Өскемен қаласы, «Арбат» демалыс аймағы.
