Шығыс Қазақстан облысында «Өскемен әуежайы» АҚ-ға қатысты тергеу аяқталды. Бұл туралы Бәсекелестікті қорғау және дамыту агенттігінің облыстық департаменті мәлім етті, деп хабарлайды F16.kz.
Ведомство жүргізген тексеру барысында әуежай әкімшілігі авиациялық отынды бөлшек саудада сату кезінде жоғары баға белгілеп, оны ұстап тұрғаны анықталды. Осы заң бұзу фактісі бойынша мемлекеттік мекеме әкімшілік құқық бұзылғаны туралы іс қозғады.
Тергеу қорытындысы бойынша, сот қаулысымен «Өскемен әуежайы» АҚ жауапқа тартылды. Іс нәтижесінде кәсіпорынға 8,9 миллион теңге көлемінде әкімшілік айыппұл салынды.
Сонымен қатар монополиялық қызметтен түскен 10,6 миллион теңге мөлшеріндегі табыс тәркіленіп, мемлекет қазынасына аударылды, – деп хабарлады департамент өкілдері.
Қазір аталған қаржылық санкциялар бойынша барлық сома бюджетке толықтай өтелді. Департамент өкілдері өңірдегі бәсекелестік ортаны қорғау және бағаның негізсіз өсуіне жол бермеу бағытындағы жұмыстар алдағы уақытта да жалғасатынын атап өтті.
