Өскеменде биыл «Халық қатысатын бюджет» бағдарламасы аясында және есептік кездесулерде тұрғындар көтерген мәселелер бойынша бірқатар көше жарықтандырылды. Бұл жұмыстар алдағы уақытта да жалғасын табады, деп хабарлайды F16.kz.
Аталған бағдарлама аясында қала бойынша жеті учаскеде көшелерді жарықтандыру жұмысы толық аяқталды. Олар:
Горно-Алтайская көшесі, 28-ден 31а үйге дейінгі аралық;
Ярославец саяжай серіктестігі;
Пушкин көшесінен (Томирис дүкені) Сиреневый переулокқа дейінгі аумақ;
19-шы шағын аудан, Әл-Фараби даңғылы бойы, 32 үйдің маңы;
Халықтар Достығы көшесі (8, 12/10, 12/9, 12/7, 12/8, 12/6, 12/5, 12/4, 27, 14/3, 22, 20, 18);
Деповская көшесі;
Жұлдыз саяжайы.
Аталған учаскелерде жұмыс толық аяқталып, жарық бағаналары орнатылды.
Биылғы есептік кездесулерде тұрғындардан келіп түскен ұсыныстар мен өтініштер негізінде 30 көшеде жарықтандыру жұмысы басталды. Олардың ішінде Заречный қиылысы, Ертіс, Сибинская, Аэродромная, Байкальская, Волжская, Рощина, Карбышева, Спортивная, Западный, Подгорная, Грейдерная, Ульбинская, Лесозаводская және тағы басқа көшелер бар. Сондай-ақ «Шынқожа ауылы» балалар алаңының маңында жарық бағаналары орнатылды. Бұл – тұрғындардың өмір сапасын жақсартуға бағытталған маңызды қадамдардың бірі, – деп атап өтті Өскемен қаласы әкімінің орынбасары Абзал Мәулетханов өңірлік коммуникациялар қызметі алаңында өткен брифингте.
Сонымен қатар қала әкімінің орынбасары балалардың қауіпсіздігін қамтамасыз ету мақсатында мектептердің маңына жарық шамдар орнатылып жатқанын айтты. Мәселен, Өскемендегі №1, 3, 4, 9, 12, 13, 14, 19, 20, 24, 26, 27, 29, 30, 34 және 43 мектептердің маңында және кіреберіс жолдарында шамдары орнатылған. Бұл жұмыстар ата-аналар мен мұғалімдер тарапынан оң қабылданып, балалардың мектепке бару және қайту жолындағы қауіпсіздігін арттыруға үлкен септігін тигізді.
Өскемен қалалық мәслихаты депутаттарының ұсынысымен қосымша үш учаскеде көше шамдары орнатылды. Атап айтқанда, автобекет маңындағы жаяу жүргіншілер жолы, бірінші Набережная көшесі және Арматура зауытының маңы жарықтандырылды.
Көшелерді жарықтандыру жұмысы алдағы уақытта да жалғасын тауып, тұрғындардың қауіпсіздігі арта түседі.
