Тамылжыған табиғатымен көпшілікті таңдандырып, туристер ағыны жыл сайын артып келе жатқан демалыс орындарының бірі – Бұқтырма жағалауы. Бүгінде онда абаттандыру жұмыстары жүргізіліп, жылу желілері ауыстырылып жатыр, деп хабарлайды F16.kz.
ШҚО әкімінің бірінші орынбасары Жақсылық Омар жағажай жұмысымен танысып, қауіпсіздік шараларын тексеріп қайтты.
ШҚО әкімі Нұрымбет Сақтағановтың тапсырмасымен Абай көшесіндегі ауқымды абаттандыру жұмыстарын қарап шықтық. Қазір онда серуендеуге және спортпен айналысуға арналған аймақтар, амфитеатр, фастфуд-аймақтар салынып, жарықтандыру, бейнебақылау, велосипед жолдары орнатылып жатыр. Сондай-ақ 1960 жылдан бері жаңартылмаған жылу желілері ауыстырылуда, — деді Жақсылық Омар.
Сонымен қатар өңірдегі туристер ағынының артуына байланысты Жаңа Бұқтырма ауылындағы амбулаторияны да жуықта жаңғырту жоспарланған. Заманауи медициналық нысан тек тұрғындар үшін емес, демалушыларға да қызмет көрсетпек.
