Тамылжыған табиғатымен талайды таңғалдырған “Рахман қайнары” шипажайының жолы 2 айға жабылады, деп хабарлайды F16.kz.
Қазір Катонқарағайға еліміздің түкпір-түкпірінен ғана емес, шет мемлекеттерден келетін туристер саны күн санап артып келеді. Алайда, 20 тамыз бен 30 қазан аралығында Шығыс туризмінің төріне айналған Рахман қайнарына бару мүмкін болмайды. Шектеу жол жөндеу жұмыстарына байланысты енгізіліп отыр.
Айта кетейік, қазіргі күні Өскемен – Алтай – Үлкен Нарын – Катонқарағай – Рахман қайнары автожолының 437-450 шақырымында тау жолын қазу, тегістеу, кеңейту сияқты күрделі жөндеу жұмыстар жүріп жатыр. Бұрын-соңды асфальт түспеген 13 шақырым тау жолына қазір қиыршық тас төселіп жатыр.
Жоба аясында гидравликалық балға арқылы жолды кеңейту жоспарланған. Яғни, тастар құлап немесе сынықтары ұшуы мүмкін. Көліктерге, адам өміріне қауіп төндіреді. Жол қауіпсіздігін қамтамасыз ету, жөндеу жұмыстарын сапалы орындап, уақытылы аяқтау мақсатында жол жабылады, — делінген «ҚазАвтоЖол» ҰК » АҚ ШҚО филиалының хабарламасында.
