Елімізде балалар мен жасөспірімдердің қоғамдық орындар мен әлеуметтік желілердегі әдепсіз әрекеттері үшін жауапкершілік күшейтілді, деп хабарлайды F16.kz.
Қазақстанда балалар мен жасөспірімдердің қоғамдық орындар мен әлеуметтік желілердегі әдепсіз әрекеттері үшін жауапкершілік күшейтілді. Енді мұндай тәртіпбұзушылықтар үшін ата-аналарға немесе заңды өкілдерге айыппұл салынады.
Қылмыстық кодекстің 131-бабына сәйкес, көпшілік алдында ар-намысты қорлау, әсіресе әдепсіз түрде (ауызша немесе жазбаша) балағаттау жауапкершілікке әкелуі мүмкін. Ал егер жай ғана көшеде дөрекі сөздер айтылса, бұл — ұсақ бұзақылыққа жатады.
Ар-намысты қорлап, балағаттағаны үшін ересектер 100 АЕК (393 200 теңгеге дейін) айыппұл төлейді немесе 120 сағатқа дейін қоғамдық жұмыстарға тартылады.
Ал, қоғамдық орында бейәдеп сөз айтқаны үшін 20 АЕК (78 640 теңге) айыппұл немесе 5–15 тәулікке дейін әкімшілік қамау жазасы тағайындалады. Егер бұл жағдай қайталанда 30 тәулікке дейін қамау қарастырылған.
Егер кәмелетке толмаған бала бейәдеп сөз айтып, әрекет жасаса ата-анасы немесе заңды өкілі жауап береді.
Жауапкершілік жас ерекшелігіне қарай бөлінеді:
– 14–16 жас: ата-аналар 7 АЕК (27 524 теңге) айыппұл төлейді;
– 16–18 жас: жасөспірім жеке жауапқа тартылуы мүмкін, егер жұмыс істемесе — ата-анасы 10 АЕК (39 320 теңге) төлейді;
– 12 жасқа дейін: толық жауапкершілік ата-аналарда, айыппұл — 10–15 АЕК (39 320 – 58 980 теңге) аралығында.
Сонымен қатар әлеуметтік желілерде балағат сөз жазу, қорқыту немесе кибербуллингке жол бергендерге қатаң шаралар қарастырылған. Мұндай жағдайларда айыппұл көлемі 200 АЕК-ке дейін (786 400 теңге) жетуі мүмкін.
Полиция әр жағдайды жеке қарап, құқықбұзушылықты дәлелдеу үшін куәгерлердің айғақтары, бейне және аудио жазбалар, жазбаша мәтіндер бойынша лингвистикалық сараптамалар қолданады.
