Жаңа оқу жылында білім гранттары мен квоталар қалай бөлінбек? Бұл туралы ҚР Ғылым және жоғары білім министрлігінің өкілдері айтып берді, деп хабарлайды F16.kz.
Министрліктің Жоғары және жоғары оқу орнынан кейінгі білім комитеті төрағасының орынбасары Жанна Есинбаеваның айтуынша, 2025-2026 оқу жылына 77 мыңнан астам грант бөлінген. Оның басым бөлігі, яғни 60%-ы техникалық бағыттағы мамандықтарға, 20%-ы педагогикалық мамандықтарға, ал қалған 20%-ы қажеттілікке байланысты әртүрлі салаға жіктеледі.
Сондай-ақ ҚР Білім туралы Заңына сәйкес, квоталық категориялар ескерілді. Мысалы:
- жетім балалар немесе мүгедектігі бар балалар;
- көп балалы және толық емес отбасынан шыққан балалар;
- мүгедек балаларды тәрбиелеп отырған отбасылардан шыққан балаларға арнайы квоталар қарастырылды.
Бұл категориялардың ерекшелігі – талапкердің квота шеңберінде де, жалпы конкурс бойынша да грант конкурсына қатысу мүмкіндігі бар.
Жыл сайын министрлік мемлекеттік білім беру тапсырысын қалыптастыру барысында ҚР Еңбек және халықты әлеуметтік қорғау министрлігі ұсынған ақпаратқа сүйенеді. Яғни, салаларға қанша маман қажет екенін анықтап, сол бойынша мемлекеттік білім беру тапсырысын қалыптастырады.
– Биыл екінші жыл қатарынан сараланған гранттарды бөлу қарастырылып отыр. 2024 жылы алғаш рет 300 сараланған грант бөлінсе, биыл да осы көлемде ұсынылуда. 150 грантты педагогикалық мамандықтарға, ал қалған 150 грантты жаратылыстану бағытындағы білім беру бағдараламаларына бөлуді жоспарлап отырмыз. Сараланған гранттың конкурсы негізгі конкурстан кейін бөлек өтеді. Ол үшін қосымша құжат тапсырудың қажеті жоқ. Барлық дерек ұлттық тестілеу орталығының базасында сақталған. Сараланған грант иегерлерінің тізімі қыркүйек айының соңында жарияланады, – дейді Ж.Есинбаева.
Айта кетейік, елімізде мемлекеттік білім беру гранты ҰБТ нәтижесі бойынша беріледі. Гранттарды беру қағидаларына сәйкес, әр талапкер өзінің өтінімінде 4 ЖОО мен 4 білім беру бағдарламасын көрсетуге құқылы.
