Катонқарағай ауданында «Алтай – түркі әлемінің алтын бесігі» халықаралық фестивалі құрметіне бірнеше жаңа нысаны бой көтерді, деп хабарлайды F16.kz.
Мұның бәрі алыс-жақыннан келген қонақтарды қабылдау, сондай-ақ мәдени және спорттық іс-шараларды лайықты деңгейде өткізу мақсатында жасалып отыр. Мәселен, аудан орталығында мың орындық жабық манежі бар жаңартылған ипподром салынды.
Аудан әкімінің орынбасары атап өткендей, ұлттық спорт түрлерінен жарыстар өтетін алаңды толығымен ретке келтіруге мүмкіндік туды.
Сондай-ақ, 60 киіз үй мен қосымша шатырлардан тұратын үлкен киіз үй қалашығы бой көтерді. Қатысушылар мен қонақтардың жайлылығы үшін қалашық аумағына жарық пен су тартылды. 15 санитарлық-гигиеналық торап орнатылды.
