Бүгінде Қазақстанға 85 елдің азаматтары 30 күнге дейін визасыз кіре алады. Оның ішінде 51 елдің өкілдері біржақты тәртіпте, 34 елдікі екіжақты келісімдер негізінде қатынай алады. Бұл туралы Шығыс Қазақстан облысы полиция департаментінің көші-қон қызметі бөлімінің мамандары мәлімдеді, деп хабарлайды F16.kz.
30 ТӘУЛІККЕ ДЕЙІН УАҚЫТША ТІРКЕУ ҚАЖЕТ ЕМЕС
Қазақстан шетелдік азаматтардың елге кіру және осында болу талаптарын жеңілдетіп жатыр. Жаңа ережелерге сәйкес, елімізге 30 тәулікке дейін келген шетелдік азаматтарға уақытша тіркеу талап етілмейді. Егер шетелдік 30 тәуліктен артық уақытқа келсе, уақытша тұруға рұқсат рәсімделеді. Бұл ретте оның өзі ешқайда бармайды, барлық рәсімдерді қабылдаушы тарап (жеке немесе заңды тұлға) шетелдік келген сәттен бастап үш жұмыс күні ішінде жүргізеді. Хабарлама электронды цифрлық қолтаңба (ЭЦҚ) арқылы визалық-миграциялық портал арқылы беріледі. Уақтылы хабарлама берілмеген жағдайда, ӘҚБтК-нің 518-бабына сәйкес әкімшілік жауапкершілік қарастырылған.
Бүгінде 85 елдің азаматтары Қазақстанға 30 күнге дейін визасыз кіре алады. Оның ішінде 51 елдің өкілі біржақты тәртіпте, 34 елдікі екіжақты келісімдер негізінде кіреді.
QR-КОДЫ БАР ТУРИСТІК КАРТАЛАР
Шетелдік азаматтардың қауіпсіздігі мен құқықтық қорғалуын арттыру мақсатында QR-коды бар туристік карталар енгізілді. QR-кодты сканерлеу арқылы пайдаланушы SAFETRAVEL.KZ порталына өтеді. Онда келесі мәліметтер орналастырылған: қауіпсіздік шаралары бойынша ұсынымдар; «102» мобильді қосымшасы арқылы полицияны шақыру және орналасқан орнын анықтау мүмкіндігі; байланыс операторлары, SIM-карталар, такси және өзге де сервистер туралы ақпарат. Портал қазақ, орыс, ағылшын және қытай тілдерінде жұмыс істейді.
ШҚО-ҒА БИЫЛ 8700 ШЕТЕЛДІК КЕЛГЕН
Қазақстанда тұрақты тұруды қалайтын шетел азаматтары тұрақты тұруға рұқсат алу үшін құжаттарын тапсырып, рұқсат алғаннан кейін Қазақстан азаматтығын алуға өтініш бере алады. Айта кету керек, биыл Шығыс Қазақстанға 8700 шетелдік азамат келген.
Көші-қон қызметінің мамандары ішкі көші-қон мәселелерін де еске салды. Егер Қазақстан азаматы басқа елдің азаматтығын алса, 30 күн ішінде Қазақстан Республикасының паспортын тапсырып, азаматтықтан шыққанын тіркеуге тиіс. Сонымен қатар Қазақстан азаматтары тұрғылықты мекенжайы бойынша міндетті түрде тіркеуге тұруы қажет.
