Бүгін Үкімет отырысынан кейінгі баспасөз мәслихатында Премьер-министр Олжас Бектенов Өскемен, Семей және Көкшетау қалаларында салынатын жылу-электр орталықтарына қатысты өз ұстанымын жеткізді, деп хабарлайды F16.kz.
Үкімет басшысының айтуынша, бұл жобаларды бастапқыда ресейлік серіктестермен бірлесіп жүзеге асыру көзделген. Дегенмен, қазіргі уақытта Ресей тарапынан нақты қаржылық ұсыныстар немесе төмен пайызбен несиелеу тетіктері ұсынылмаған.
– Бұл жобалар бойынша Ресеймен бірлесе жұмыс істеу мүмкіндігі қаралды. Алайда, әзірге қаржыландыруға қатысты нақты әрі кепілді ұсыныстар түскен жоқ. Сол себепті біз Көкшетаудағы нысанды өз күшімізбен салып бастадық. Бұл іске «Самұрық-Энерго» да белсенді қатысуда. Ал Өскемен мен Семейдегі нысандар бойынша ресейлік тараптан жауап күтіп отырмыз. Егер жақын арада жауап болмаса, бұл жобаларды өз бетімізше іске асыру жолдарын қарастырамыз. Уақыт жоғалтуға құқымыз жоқ, – деді Премьер-министр.
Баспасөз мәслихатында журналистер тарапынан «Мұндай ауқымды жобаларды Қазақстан өз қаржысы есебінен жүзеге асыра ала ма?» деген де сұрақ қойылды.
– Әрине, жүзеге асыра аламыз. «Самұрық-Энерго» нарықтық қаржыландыру тетіктеріне ие. Жалпы алғанда, ЖЭО – бұл таза бизнес-жоба. Құрылыс аяқталып, нысан іске қосылған соң, ол өзін-өзі ақтап, салынған инвестицияны қайтарады, – деп жауап берді Үкімет басшысы.
Айта кетейік, бұған дейін Энергетика министрі Ерлан Ақкенженов аталған жобаларға қатысты келіссөздер 18-25 маусым аралығында өткен Петербург халықаралық экономикалық форумында талқыланатынын хабарлаған болатын.
