Шығыс Қазақстан облысында жастар арасында есірткі қылмысының алдын алуға және салауатты өмір салтын насихаттауға бағытталған «Нашақорлыққа жол жоқ!» облыстық жастар форумы өтті, деп хабарлайды F16.kz.
Ауқымды шараның басты мақсаты – жастар арасында есірткіге тәуелділіктің алдын алу, нашақорлыққа деген тұрақты теріс көзқарас қалыптастыру, сондай-ақ жас буынның психологиялық төзімділігі мен әлеуметтік жауапкершілігін арттыру.
Іс-шараға облыстың әр өңірінен 150-ге жуық жас қатысқан. Олардың қатарында жалпы білім беретін мектептердің 11-сынып оқушылары мен техникалық және кәсіптік білім беру ұйымдарының студенттері бар.
Жастармен жұмыс барысында нашақорлықтың адам өміріне тигізетін зардабы, есірткіге тәуелділіктің алдын алу жолдары, зиянды әдеттердің денсаулық пен болашаққа әсері туралы кеңінен айтылды. Сонымен қатар қатысушыларға салауатты өмір салтын қалыптастырудың маңызы түсіндіріліп, құқықтық сауаттылықты арттыруға басымдық берілді.
Пікір алмасудан бөлек форум барысында психологтар, прокуратура өкілдері, “ESBOL QORY” ШҚОФ төрағасы жастармен дәріс өткізеді. Бұл іс-шара еліміздің барлық қала-аудандарында ұйымдастырылып отыр. Ондағы мақсат — жастан арасында нашақорлыққа қарсы мәдениет қалыптастыру, — дейді облыстық жастар ресурстық орталығының директоры Айдос Әділбеков.
Тағылымды шараның шымылдығы нашақорлықтың адам тағдырына тигізетін ауыр зардабын бейнелейтін әсерлі бейнематериалдармен ашылды. Есірткіге әуестік салдарынан өмірі түбегейлі өзгерген адамның тағдырын баяндайтын бейнероликтер жастарға ой салып, есірткінің бір ғана қате қадамнан басталып, адамның болашағына орны толмас зиян келтіруі мүмкін екенін көрсетті.
Нашақорлық – жеке адамның ғана емес, тұтас қоғамның қауіпсіздігі мен елдің болашағына әсер ететін күрделі мәселе.
Форум барысында есірткі қылмыстарының алдын алу және заңсыз есірткі айналымының қауіптілігі жөнінде құқық қорғау органдарының өкілдері де ақпарат берді.
Облыстық полиция департаменті есірткі қылмыстарына қарсы күрес басқармасының жедел уәкілі, полиция капитаны Мәди Қалиакпаров жастарға есірткі қылмысына қатысы бар кез келген әрекеттің заң алдында жауапкершілікке әкелетінін айтып, әсіресе әлеуметтік желілер мен Telegram арналары арқылы таратылатын күмәнді ұсыныстардан сақ болуға шақырды.
Нашақорлық — еліміздегі ең өзекті мәселелердің біріне айналып отыр. Жыл басынан бері облыстық полиция департаменті 260-тан астам құқықбұзушылық тіркеді. Оның 96-сы есірткіні таратуға байланысты болып отыр. Төрт жағдайда кәмелетке толмаған жасөспірімдер ұсталды. Темір торға тоғытылғандар қатарында өмірі енді ғана басталған үш студент бар. Заңсыз айналымнан 260 келіден астам есірткі тәркіленді, – деді ол.
Маманның айтуынша, қазіргі таңда жастарды есірткі қылмысына тарту тәсілдері де өзгеріп келеді. Қылмыстық топтар өз қатарын толықтыру үшін интернеттегі түрлі жарнамалар мен мессенд жерлердегі жасырын арналарды пайдалануы мүмкін. Әдетте мұндай ұсыныстарда «оңай ақша табу», «жоғары табыс» секілді уәделер айтылады. Алайда оның артында заңсыз әрекет пен ауыр қылмыстық жауапкершілік тұруы әбден мүмкін.
Бұл қылмыстың артында кім тұрғанын анықтау өте ауыр. Алайда «курьер» болып ақша таппақ болған өрімдей жас балалар өз өмірлеріне балта шабады. Сондықтан Telegram арналардағы жарнамалардан, оңай ақша табу туралы күмәнді ұсыныстардан аулақ жүрген жөн, – деді Мади Маратұлы.
Бұл ретте жастардың құқықтық сауаттылығын арттырудың маңызы зор. Өз әрекетінің заңдық салдарын білмеу жауапкершіліктен босатпайды.
Мемлекет жастарды жан-жақты қолдауға, олардың білім алып, кәсіп меңгеріп, қоғамның белсенді мүшесі ретінде қалыптасуына ерекше мән беріп келеді. Осы ретте өскелең ұрпақтың денсаулығын қорғау, олардың бос уақытын тиімді ұйымдастыру және зиянды әдеттерден аулақ болуына жағдай жасау – маңызды бағыттардың бірі.
Нашақорлықтың алдын алу тек құқық қорғау органдарының немесе арнайы мамандардың міндеті емес. Бұл – отбасы, білім беру ұйымдары, мемлекеттік органдар және жалпы қоғам болып атсалысуды қажет ететін ортақ мәселе.
