Шығыс Қазақстан облысында шомылу маусымы басталғалы бері су айдындарында сегіз адам көз жұмған. Бұл туралы ШҚО ТЖД баспасөз қызметі мәлім етті, деп хабарлайды F16.kz.
Су айдындарындағы жазатайым жағдайлардың алдын алу үшін құтқарушылар күн сайын патрульдік рейд жүргізеді. Десе де, оқыс оқиғалар азаймай тұр.
Өңірде шомылу маусымы басталғалы бір айдам астам уақыт өтті. Осы аралықта 1300-ден астам рейдтік іс-шара өткізілді. Рейд барысында демалушыларға судағы қауіпсіздік ережелері түсіндіріліп, заңбұзушылықтар анықталды. Су айдындарындағы қауіпсіздік талаптарын сақтамағаны үшін Әкімшілік құқық бұзушылық туралы кодекстің 412-бабы бойынша 21 адам әкімшілік жауапкершілікке тартылды, — дейді департаменттің баспасөз қызметі.
ШҚО ТЖД құтқарушылары тұрғындарға тек рұқсат етілген орындарда ғана шомылуға, балаларды қараусыз қалдырмауға, мас күйінде суға түспеуге және су көліктерімен демалған кезде міндетті түрде құтқару кеудешесін киюге кеңес береді.
