Шығыс Қазақстан облысында шомылу маусымы аяқталды. Өңір құтқарушылары бұл маусымда 10 қайғылы жағдай тіркеген, деп хабарлайды F16.kz.
ШҚО ТЖД мамандары қайғылы оқиғалардың барлығы шомылуға ресми түрде тыйым салынған, арнайы жабдықталмаған жағажайларда болғанын айтады.
Құтқарушылардың жедел әрекетінің арқасында жазатайым жағдайдан аман шыққандар да бар. Су айдындарын патрульдеу кезінде 28 адам, оның ішінде 8 бала құтқарылып, қауіпсіз жерге шығарылды. Маусым бойы өңір акваториясында 8 арнайы құтқару бөлімшесі үздіксіз кезекшілік атқарып, 38 құтқарушы арнайы дайындықтан өтті, — дейді ШҚО ТЖД баспасөз қызметі.
Сондай-ақ департамент қызметкерлері жергілікті әкімдіктермен және еріктілермен бірлесіп, қауіпсіздік ережелерін түсіндіру бойынша ауқымды жұмыстар жүргізген. Атап айтқанда, 1800-ден астам профилактикалық рейд пен патрульдеу ұйымдастырылды. Судағы қауіпсіздік талаптарын елемеген 102 азамат әкімшілік жауапкершілікке тартылған. Шағын көлемді кемелер мен олардың тұрақтарын пайдалану ережесін бұзғандарға қатысты 66 әкімшілік жаза қолданылды.
Облыста шомылуға қолайлы деп танылған 23 учаске белгіленгенімен, олардың көбі талапқа сай болмай шықты. Мамандар жүргізген тексеру қорытындысына сәйкес, 22 демалыс орны бекітілген су айдындарындағы қауіпсіздік ережелеріне сәйкес келмейтіні анықталған, — делінген департамент хабарламасында.
Бүгінгі таңда Шығыс Қазақстан облысының аумағында шомылуға ресми түрде қатаң тыйым салынған 93 орын бар. ТЖД мамандары тұрғындарды өз өмірлеріне жауапкершілікпен қарап, белгіленбеген жағажайларда суға түспеуге шақырады.
