Жаңа оқу жылында Қазақстанның шағын қалалары мен ауылдарындағы тағы 1 мың мектеп жаңғыртудан өтеді, деп хабарлайды F16.kz тілшісі Оқу-ағарту министрлігіне сілтеме жасап.
Мемлекет басшысының тапсырмасы бойынша шағын қалалар, аудан орталықтары мен ауылдардағы мектептерді жаңғырту жұмыстары жалғасуда. Жыл сайын кемінде 1 мың мектеп жеті бағыт бойынша жаңғыртудан өтеді.
– Жаңғыртудың мақсаты – балалардың білім алуы мен тәрбиеленуі үшін қолайлы жағдай жасау, материалдық-техникалық базаны нығайту арқылы қалалық және ауылдық мектептер арасындағы білім сапасындағы алшақтықты азайту, – деп хабарлайды министрліктен.
Жаңғырту аясында күрделі және ағымдағы жөндеу жұмыстары, пәндік кабинеттерді, кітапханалар мен асханаларды жабдықтау, мектеп жиһаздарын жаңарту, қауіпсіздік жағдайларын жақсарту қарастырылған.
Осылайша, 2025-2026 оқу жылында робот техникасы, химия, биология, физика және STEM бағыттары бойынша 1 мыңға жуық заманауи пәндік кабинет сатып алу жоспарланып отыр. Сондай-ақ 509 мектептің кітапханасын, 375 асханасын жаңғырту, 598 білім ордасына күрделі және ағымдағы жөндеу жүргізу, 409 мектептің жиһаздарын жаңарту көзделуде. Жүргізілген жұмыстардың нәтижесінде 369 мың оқушының оқу жағдайы жақсаратын болмақ.
