Шығыс Қазақстан облысының Катонқарағай ауданында аю мен қасқырдың саны жылдан-жылға артып келеді. Төр Алтайдың қойын—қолаты ерекше қорғалатын табиғи аумаққа кіргендіктен онда аң алулауға тыйым салынған, деп хабарлайды F16.kz.
Катонқарағай мемлекеттік ұлттық табиғи паркі қызметкерлері жүргізген санаққа сәйкес, биыл бұл өлкеде 340 аю, 11 қар барысы, 1 сабаншы, 12 тау сусары, 146 қасқыр, 190 қабан мекен ететіні анықталған. Осылардың ішінде әсіресе аю мен қасқырдың көбеюі малмен жан баққан жергілікті жұртты алаңдатады.
Бұл мәселені заң жүзінде қайта қарау керек. Қазір балық жейтін құстарды ұстауға да тыйым салынған. Арнайы орындарға қасқыр, аю, суқұзғынның залал келтіруіне байланысты тиісті хат жазып едік, жауап бермеді. Олардың айтатын жалғыз уәжі – 2017 жылы заң шыққан, одан аттап кете алмаймыз деді, – деді Катонқарағай МҰТП қызметкері Ерік Қасымов.
АШЫҚҚАН ЖЫРТҚЫШ МАЛҒА ШАБАДЫ
Оның айтуынша, аң аулауға әкімшілік аумақта ғана рұқсат беріледі.
Көктем ерте шықты, қазір бірде-бір жеміс-жидек жоқ, бәрі үсіп кетті. Аюдың тамағы сол, ашығады, ашыққан соң малға шабады. Бір дәндеп алған соң қайта-қайта ауылға түседі. Табиғаттан қажетті азық қорын алмаған соң жыртқыштардың малға шауып жатқаны сол себептен, – деп қосты табиғат сақшысы.
Табиғат жанашырлары алдағы уақытта Ресейдегі Катунь биосфералық табиғи қорығына барып, сол аумақта қар барысын фототұзаққа түсіріп алуды жоспарлап отыр.
Катонқарағай мемлекеттік ұлттық табиғи паркі 2001 жылы құрылған. Бұл – еліміздегі аумағы жағынан ең ірі табиғи парк. Парктің аумағы 643 мың гектардан асfды, оның 215 мың гектары – орман, онда 24 мың текше метр ағаш қоры бар. Осындай ауқымды алқапты еншілеп отырған табиғи парктің аумағында сүтқоректілердің 72 түрі, құстардың 250-ден астам түрі кездеседі. Бұғы, бұлан, таутеке, аю, сілеусін, құну және тағы басқа аңдар бар. Сирек кездесетін, Қазақстанның Қызыл кітабына енгізілген ұлар, қара дегелек сияқты құстар да тіршілік етеді.
2014 жылдан бері Катонқарағай МҰТП ЮНЕСКО-ның ерекше қорғалатын табиғи мұрасының тізіміне кірген.
Тимур Серікхан
