Катонқарағай мен Зайсанда салынып жатқан әуежайлардың әрқайсысында төрт әуе кемесіне арналған перрон мен сағатына 150 жолаушыға қызмет көрсетуге қауқарлы жолаушылар терминалы болады, деп хабарлайды F16.kz.
ШҚО-ға жұмыс сапарымен келген Көлік вице-министрі Талғат Ластаев өңір тұрғындарымен кездесу барысында Зайсан мен Катонқарағайда құрылысы жүріп жатқан әуежайлар туралы да айтты.
– Өздеріңізге белгілі, қазіргі уақытта екі ауданда әуежайлар құрылысы жалғасуда. Біздің тарапымыздан аталмыш нысандардағы жұмыс қарқыны мен сапасына ерекше мән беріліп отыр. Бүгінге дейін қазаншұңқыр қазу, асфальттың төменгі қабатын төсеу және нығыздау, периметрлік жолды салу, құрылысқа қажетті инертті материалдар дайындау сияқты жұмыстар аяқталып қойды, – деген вице-министр әуежай аумағында бірқатар нысан болатынын мәлім етті.
Оның айтуынша, әрбір әуежай ұшу-қону жолағынан бөлек, төрт әуе кемесіне арналған перронмен, рулеж жолымен, сағатына 150 жолаушыны қабылдай алатын терминалмен, сондай-ақ авариялық-құтқару қызметі ғимаратымен және зертханалық-өндірістік корпус сияқты басқа да құрылыстармен қамтылмақ.
Сол сияқты, Талғат Ластаев облысымыздың бас әуе қақпасы саналатын Өскемен қаласының әуежайына да ерекше мән берілетінін айтты. Бүгінде бұл әуежайдан 5 бағыт бойынша (Астана, Алматы, Шымкент, Қарағанды және Зайсан) 56 ішкі әуе рейсі және 3 бағыт бойынша (Мәскеу, Новосібір және Анталия) 9 халықаралық рейс орындалады.
Айта кетейік, биыл Өскемен – Зайсан бағыты бойынша бір ішкі облыстық әуе маршруты субсидиялануда. Осы ретте, аталмыш бағыт бойынша аптасына 4 (9 ай бойы) және 5 рейске (3 ай ішінде) 187 миллион теңге мөлшерінде қаражат бөлінгенін айту керек. Қазіргі уақытта Өскемен мен Зайсан арасындағы әуе рейсінің билеті 15 мың теңге тұрады.
Осыған дейін ШҚО әкімі Нұрымбет Сақтағанов екі аудандағы әуежайлардан алғашқы рейстер биыл жасалады деп жоспарланып отырғанын айтқан.
