Зайсан ауданында жұмыс сапарымен жүрген Шығыс Қазақстан облысының әкімі Нұрымбет Сақтағанов Сәтпай ауылы маңында салынып жатқан әуежай құрылысымен танысты, деп хабарлайды F16.kz.
Бұл туралы Шығыс Қазақстан облысы әкімінің баспасөз қызметі мәлім етті. Аймақ басшысының айтуынша, әуежай құрыысы жоспарға сай жүргізіліп жатыр.
Әуежай құрамына 4000 шаршы метрлік аэровокзал, ұшақ жүретін жолақтар, төрт әуе кемесіне арналған перрон, командалық-диспетчерлік пункт, апаттық-құтқару қызметі, метеостанциялар және радионавигациялық жабдықтар кіреді.
Әуежай іске қосылғаннан кейін Астана, Алматы және Өскемен қалаларына ұшақтар қатынай бастайды. Сонымен қатар Қытайдың Үрімші қаласына, Алтай ауданына және Қанас көліне халықаралық бағыттар ашу көзделген.
Бұл әуежай Bombardier Q400, ATR-72 және осыған ұқсас өңірлік деңгейдегі әуе кемелерін қабылдай алады.
Аталған жоба – Мемлекет басшысы Қасым-Жомарт Тоқаевтың бастамасымен жүзеге асырылып отырған Қазақстанның курорттық аймақтарында үш жаңа әуежай (Зайсан, Катонқарағай, Кендірлік) салуға бағытталған ауқымды бағдарламаның бір бөлігі болып саналады.
Фото: ШҚО әкімінің баспасөз қызметі
