Қазақстанда кітап оқуға деген қызығушылық айтарлықтай артып келеді. Биыл еліміздегі кітапханалар келушілер санының рекордтық көрсеткішін тіркеп отыр. Жыл басынан бері 37 миллион оқырман кітапханаға барған, деп хабарлайды F16.kz.
Мәдениет және ақпарат министрлігінің мәліметіне сенсек, соңғы бір айдың өзінде Алматыдағы Қазақстан Республикасының Ұлттық кітапханасының қызметіне шамамен 13 мың адам жүгінген. Ең белсенді оқырмандар – 17 мен 25 жас аралығындағы жастар, ал 45 жастан асқан келушілердің саны – екі мыңға жуық. Шамамен үш мың адам кітапханаға алғаш рет тіркелген.
– Оқырмандар көбіне қазақ және әлем әдебиетінің классикалық және көркем шығармаларын оқығанды жөн көреді. Кітап сүйер қауым көбіне романдар, повестер мен поэзияны таңдайды. Соңғы айларда қазақ классикасына және ұлттық философиялық әдебиетке қызығушылық айтарлықтай артқан, – деп хабарлайды дерек көзі.
Айта кетейік, бүгінде Қазақстанда 3 883 қоғамдық кітапхана жұмыс істеп тұр. Жыл басынан бері ел бойынша 5,3 миллионнан астам жаңа оқырман тіркелген.
