Шығыстың бас шаһарында «Алтай – түркі әлемінің алтын бесігі» халықаралық конференциясы өтіп жатыр. Екі күнге жоспарланған халықаралық жиынға еліміздің ғана емес, өзге де мемлекетен 200-ден астам ғалым, зерттеуші және білім беру ұйымдарының өкілдері онлайн және офлайн қатысты, деп хабарлайды F16.kz.
Аталмыш дәстүрлі конференция биыл оныншы рет ұйымдастырылып отыр.
Конференцияның негізгі мақсаты – тарихи-мәдени мұраларды жас ұрпаққа кеңінен насихаттау, олардың тарихи маңызы мен мәнін терең түсіндіру. Конференцияға Жапония, Түркия және Моңғолия мемлекеттерінен арнайы шақырылған ғалымдар қатысып отыр. Атап айтқанда, Жапониядан бір профессор, Түркиядан танымал тарихшы және Моңғолиядан профессор келіп, пленарлық отырыста өз баяндамаларын ұсынады. Сонымен қатар еліміздің өзге де жоғары оқу орындары мен түрлі ғылыми-зерттеу орталықтарының өкілдері қатысып, өзара тәжірибе алмасуға мүмкіндік алып отыр. Қатысушылардың баяндамалары түркі халықтарының тарихын, мәдениетін және рухани мұрасын тереңірек зерделеуге бағытталған, — деп атап өтті “Алтайтану” ғылыми-зерттеу орталығының директоры Майра Тарлаубай.
Биылғы конференция Бүкілодақтық түркітанушылардың І съезінің 100 жылдығы мен В.В. Радловтың Орхон экспедициясының 135 жылдығына орай ұйымдастырылды.
Халықаралық жиынға Қазақстанның әр өңірінен және Түркия, Моңғолия, Жапония, Германия, Мажарстан, Қытай, Малайзия, Ресей мен басқа да елдерден 200-ден астам ғалым, зерттеуші және білім беру ұйымдарының өкілдері қатысып жатыр.
«Алтай — түркі әлемінің алтын бесігі, сан ғасырлық тарих пен өркениеттің тоғысқан мекені. Өңіріміздегі Берел, Елеке сазы және Ақбауыр сияқты бірегей археологиялық ескерткіштер — бай тарихымыздың айқын дәлелі. Оларды зерттеу арқылы ежелгі өркениеттердің мәдениеті мен тұрмыс-тіршілігі туралы құнды деректерге қол жеткізудеміз. Облыста археологиялық зерттеулерді қолдау, тарихи ескерткіштерді сақтау және мәдени мұраны насихаттау бағытында жүйелі жұмыс жүргізілуде. Осы конференция тың ғылыми жаңалықтарға, бірлескен жобалар мен нәтижелі халықаралық ынтымақтастыққа жол ашады деп сенемін, — деді Нұрымбет Сақтағанов.
Пленарлық отырыста Алтайдың тарихи-мәдени мұрасы, ежелгі түркі тайпаларының тарихы, Шығыс Қазақстанның Шыңғыс хан мен Алтын Орда тарихындағы орны, көне түркі ескерткіштері және түркітанудағы заманауи зерттеу тәсілдері талқыланды.
Конференция аясында алты ғылыми бағыт бойынша секциялық отырыстар өтті. Қатысушылар археология, түркі халықтарының рухани мұрасы, көшпелі мәдениет, тарихты оқытудың заманауи әдістері, цифрлық технологиялар мен жасанды интеллектіні білім беру саласында қолдану мәселелерін қарастырды.
Сондай-ақ қатысушылар назарына «Ұлы Дала алтыны» тарихи-археологиялық көрмесі мен «Тамыры терең Алтай – түркі жұртының негізі» атты кітап көрмесі ұсынылды. Ал бүгін ғалымдарға арналған ғылыми-танымдық экскурсия ұйымдастырылады.
