Қазақстанда ауыл шаруашылығы жануарларына арналған мал азығын дайындау науқаны аяқталды, деп хабарлайды F16.kz тілшісі Ауыл шаруашылығы министрлігіне сілтеме жасап.
Жергілікті атқарушы органдардың мәліметінше, өңірлер 25 миллион тонна шөп (жоспардың 103,1%), 1,9 миллион тонна сенаж (113,3%), 5,4 миллион тонна құрама жем (98,4%), 2,1 миллион тонна силос (107,3%), 4,9 миллион тонна сабан (106,6%) жинаған.
Жалпы республика бойынша барлық түрлерін қоса есептегенде 39,8 миллион тонна мал азығы әзірленді. Бұл қыс маусымында малдарды ұстауға жеткілікті әрі сенімді қор қалыптастырады.
Бірқатар облыстар науқанды жоғары деңгейде өткізіп, жоспарды айтарлықтай артығымен орындады. Олардың қатарында: Солтүстік Қазақстан (147,1%), Шығыс Қазақстан (116,0%), Алматы (105,6%), Жетісу (104,5%), Ақтөбе (103,2%), Қызылорда (102,3%), Ұлытау (102,4%) облыстары бар.
Сенаж дайындау бойынша Солтүстік Қазақстан (163,5%), Жамбыл (114,6%), Қостанай (108,0%), Алматы (107,5%), Павлодар (105,0%), Түркістан (106,2%), Жетісу (105,1%) облыстары жоғары көрсеткішке қол жеткізді.
– Мал азығы қазіргі деңгейде еліміздің мал шаруашылығы секторының қажеттілігін толық қамтамасыз етеді. Яғни, 2025-2026 жылдарға қысқы маусымда малды қыстатуды оңтайлы өткеруге, жемшөп тапшылығы тәуекелдерін барынша төмендетуге мүмкіндік береді, – деп жазады Ауыл шаруашылығы министрлігінің баспасөз қызметі.
