Бүгін ШҚО әкімі Нұрымбет Сақтағанов Риддер жылу электр орталығынаың жұмысын тексерді. Сондай-ақ тұрғындардың өтінішімен Гагарин көшесіндегі көп қабатты үйлердің біріне барып, жылумен жабдықтау жүйесін көрді. Бұл туралы аймақ басшысы Instagram желісінде жазды, деп хабарлайды F16.kz.
Естеріңізде болса, бұған дейін риддерліктердің әлеуметтік желілерде қатты аяздан үйлері суып кеткенін айтып дабыл қаққаны туралы жазғанбыз. Тұрғындар шағымы аймақ басшысының назарынан тыс қалмады.
Қазір Риддер ЖЭО-да №2, 3, 4, 5 және 6 қазандықтар іркіліссіз, штаттық режимде істеп тұр, №1 қазандық – резервте. Қалаға жылу тұрақты беріліп жатыр.
Өңір басшысы Гагарин көшесіндегі тұрғын үйде ішкі жылу жүйелерінің жағдайына ерекше назар аударды. Тексеру барысында жылу құбырлары мен батареялардың бітелгені анықталды. Кейбір жағдайларда үйдің жылу тораптарындағы қысымды дұрыс реттеу қажеттігі байқалып отыр.
Сонымен қатар үйге беріліп жатқан жылу тасымалдағыштың температурасы жоғары, кері желіде де жылу бар. Анықталған барлық мәселелер бойынша жауапты қызметтерге нақты тапсырмалар беріліп, олардың орындалуы облыс әкімінің жеке бақылауына алынды.
Айта кетейік, 2023-2025 жылдар аралығында ЖЭО-да ауқымды жөндеу және жаңғырту жұмыстары жүргізіліп, олардың техникалық әрі экономикалық тұрғыдан нақты нәтижелері байқалып келеді.
Мәселен, ашық тарату құрылғыларында жүргізілген жұмыстардан соң электр желілеріндегі шығыс азайып, кәсіпорынның шығыны қысқарды. Орталық қызметкерлері мердігер ұйыммен бірлесе отырып, №4 қазандық агрегатын реттеу бойынша ауқымды жұмыс атқарды. Соның нәтижесінде қолданылатын мазут көлемі белгіленген нормативтерге жеткізілді. Кешенді тарату құрылғыларын жаңғырту қосалқы электр жабдықтарындағы апаттық және қорғаныс жүйелерінің бостан бос іске қосылуының санын азайтты.
2025 жылы электр энергиясын өндіру бойынша оң динамика тіркелді. 2023 жылы ЖЭО қабылданған сәтте бірқатар объективті себептерге байланысты электр энергиясын өндіру іс жүзінде мүмкін болмаған. Ал 2024-2025 жылдары орталық өзін толық көлемде электр энергиясымен қамтамасыз етіп қана қоймай, оны сатуға да мүмкіндік алды.
Жылу желілерінде жүргізілген жөндеу жұмыстарының нәтижесінде де оң көрсеткіштер байқалуда: желілік судың қосымша толтырылу көлемі екі есеге жуық қысқарды. Бұл жылу желілеріндегі шығындардың азайып, жылумен жабдықтаудың сенімділігі артқанын көрсетеді.
Орталықтың және қаланың жылумен жабдықтау жүйелерінің жағдайын жақсарту бағытындағы жұмыстар жалғасып жатыр. Барлық мәселе аймақ басшысының тұрақты бақылауында.
