Астанада «Қазақстанның конституциялық құндылықтар жүйесіндегі тарихи-мәдени мұраның орны мен маңызы» тақырыбында SARAP эксперттік клубының отырысы өтті.
Жиында тарихи-мәдени мұраның конституциялық деңгейде бекітілген құндылықтар жүйесіндегі рөлі, ұлттық бірегейлік пен қоғамдық келісімді нығайтудағы маңызы кеңінен сөз болды. Сарапшылар тарихи жады мен мәдени сабақтастықтың мемлекеттікті күшейтудегі стратегиялық мәніне тоқталып, мәдени мұраны қорғау тек мәдени саясаттың бір бағыты емес, конституциялық құрылымның ажырамас бөлігі екенін атап өтті.
Қазақстан қоғамдық даму институты басқарма төрағасының орынбасары Мунира Абулова жаңа Конституция жобасында мәдениет, білім, ғылым және инновация салаларына ерекше басымдық берілгенін айтты.
Тарихи-мәдени мұра – қоғамның рухани тірегі әрі конституциялық құндылықтардың мазмұнын айқындайтын маңызды фактор. Жаңа жоба ұлттық құндылықтарға айрықша мән беріп, азаматтар мен мемлекеттің міндеттерін нақтылай түседі, – деді модератор.
«Қазақ газеттерінің» бас директоры, Конституциялық комиссия мүшесі Дихан Қамзабекұлының айтуынша, жаңа жоба бұрын ашық айтылмаған, бүгінгі күн үшін өзекті мәселелерді қамтыған.
Ата заңның преамбуласында мыңжылдықтар сабақтастығы, білім мен ғылым, мәдениет құндылықтары көрініс тапқан. Бұл бағыттардың Конституция деңгейінде бекітілуі мәдениет саласының дамуына, тарихи мұраны дәріптеуге және рухани құндылықтарды нығайтуға серпін береді, – деді ол.
Сондай-ақ Қазақстанның Ұлттық академиялық кітапханасы директоры, ЮНЕСКО-ның «Әлем жады» жобасы бойынша ұлттық комиссия төрағасы Күміс Сейітова тарихи-мәдени құндылықтарды Конституцияда бекітудің халықаралық деңгейде насихаттауға жол ашатынын атап өтті.
Жиында Қазақстан Жазушылар одағының мүшесі, ақын Серікзат Дүйсенғазы мен ҚЭЗИ Этномедиация орталығының директоры, мәдениеттанушы Фарида Мұсатаева да сөз сөйледі. Олар тарихи-мәдени мұраны қорғауға бағытталған конституциялық қағидаттарды іске асырудағы мемлекеттің және ғылыми-зерттеу институттарының рөліне тоқталды.
Отырыс барысында тарихи мұраны ғылыми тұрғыдан зерделеу, оны ұлттық және халықаралық деңгейде кеңінен насихаттау мәселелері талқыланды. Сарапшылар бұл бағыттағы жұмысты жүйелеу, тиімділігін арттыру бойынша ұсыныстарын ортаға салды.
Жиын қорытындысында қатысушылар жаңа Конституция жобасы мемлекеттік басқарудың теңгерімді моделін қалыптастырып қана қоймай, тарихи-мәдени мұраны дәріптеуге де тың серпін береді деген ортақ пікірге келді.
