Шығыс Қазақстан облысының мәдениет саласында сыбайлас жемқорлыққа қарсы заңнамадағы соңғы өзгерістер талқыланды. Мемлекеттік қызмет істері агенттігінің ШҚО бойынша департаменті өкілдері өткізген жиында негізгі назар квазимемлекеттік сектордағы жауапкершілікті күшейтуге аударылды, деп хабарлайды F16.kz.
Ведомство басшысы Ержан Айқымбеков парасаттылық мәдениетін қалыптастырудың негізгі қағидаттары, сыбайлас жемқорлық тәуекелдерінің алдын алу шаралары және квазимемлекеттік сектордағы мүдделер қақтығысына жол бермеу туралы айтып берді.
Кейінгі жылдары еліміздің сыбайлас жемқорлыққа қарсы заңнамасына бірқатар өзгеріс енгізілді. Квазимемлекеттік сектордағы жемқорлық үшін жауапкершілікті күшейту қарастырылған. Сыбайлас жемқорлық қылмысын жасаған адамдарға мемлекеттік қызметке және квазимемлекеттік сектор субъектілеріне жұмысқа орналасуға өмір бойына тыйым салынады, – деп атап өтті ол.
Сыбайлас жемқорлыққа қарсы заңнама талаптарына сәйкес мемлекеттік қызметшілерге теңестірілген адамдардың тізімі кеңейтілді. Оларға мемлекеттік ұйымдар мен квазимемлекеттік мекемелердің басшылары, сондай-ақ мемлекеттік сатып алулар бойынша шешім қабылдайтын немесе бюджеттен, Ұлттық қордан қаржыландырылатын жобаларды іріктеу мен іске асыруға жауапты лауазымды тұлғалар жатады.
Мемлекеттік ұйымда немесе квазимемлекеттік секторда басқару қызметін орындайтын тұлға – бұл аталған ұйымдарда ұйымдастырушылық-өкімдік немесе әкімшілік-шаруашылық функцияларды тұрақты, уақытша немесе арнайы өкілеттік бойынша орындайтын тұлға, – деп түсіндірді Ержан Айқымбеков.
Сонымен не өзгерді?
- Сыйлыққа толық тыйым: Мемлекеттік қызметшілер мен олардың отбасына қызметіне байланысты кез келген сыйлық алуға немесе беруге болмайды.
- Туыстардың бағыныстылығы: Жақын туыстар мен ерлі-зайыптылардың тікелей бір-біріне бағынысты қызмет атқаруына тыйым салынған.
- Квазисектордағы жауапкершілік: Бюджеттен қаржыландырылатын жобаларға жауапты басшылар мен сатып алу мамандары енді мемлекеттік қызметшілерге теңестірілді.
- Мүдделер қақтығысы: Жеке мүдде мен қызметтік міндет түйіскен жағдайда, қызметкер шешім қабылдаудан шеттетілуге тиіс.
- Жазаның қатаңдауы: Жемқорлық үшін сотталғандарға шартты түрде мерзімінен бұрын босатылу құқығы берілмейді және мемлекеттік қызметке қайта келуге өмір бойына тыйым салынады. Жазаны бірден қоныс колонияларында өтеу мүмкіндігі алынып тасталды. Ірі және аса ірі мөлшерде пара алғаны үшін жазаны орташа және максималды қауіпсіздік мекемелерінде өтеу қарастырылған. Бұл жемқорлар үшін артықшылықты жағдайларды жойып, жазаның алдын алу әсерін күшейтеді.
- Хабарлағаны үшін сыйақы: Жемқорлық фактісі туралы хабарлағандарға 4000 АЕК-ке дейін сыйақы беріледі және олардың еңбек құқықтары мемлекет қорғауында болады.
- Кірістерді жариялау: Саяси қызметшілер мен квазисектор басшылары өздері мен жұбайларының табыстарын жыл сайын жариялауға міндетті.
Облыстық мәдениет басқармасы тілдерді дамыту және ономастика бөлімінің басшысы Болат Кенчимбаев сыбайлас жемқорлық тәуекелдерінің алдын алу шаралары басқармада тұрақты түрде жүргізілетінін айтты.
Бүгін біз ҚР сыбайлас жемқорлыққа қарсы заңнамасындағы жаңашылдықтар туралы толығырақ білдік. Бұрын сыбайлас жемқорлық тәуекелдерінің субъектілері ретінде тек мемлекеттік қызметшілер мен олардың басшылығы қарастырылса, енді жаңа заңнама бойынша бұл тізімге квазимемлекеттік сектор ұйымдарының басшылары (және оларға теңестірілген адамдар) да енгізілген, – деді Болат Кенчимбаев.
