Қазақстан халқына Жолдауын жариялап жатқан Президент Қасым-Жомарт Тоқаев еліміздегі электр энергиясының тапшылығына қатысты мәселені қозғады.
Мемлекет басшысы энергетика саласы жыл сайын елеулі тапшылыққа тап болатынын атап өтті. Соның салдарынан қыс мезгіліндегі электр энергиясына сұраныс шарықтайтын кезеңдерде көрші елдерден электр қуаты қымбат бағамен сатып алынады. Ал жазда сол электр энергиясы керісінше, айтарлықтай төмен бағамен кері қайтарылады.
— Міне, ондаған жыл бойы жалғасып келе жатқан қарапайым ғана «бизнес» осы. Маған мұның энергетика саласындағы қалыпты тәжірибе екеніне сендіруге тырысады. Сондықтан кезінде Балқаштағы жылу электр орталығының құрылысын бастап қойған жерінен тоқтатып тастағаны да таңғаларлық емес. Қазір Түркістан, Қызылорда, Алматы және Екібастұз қалаларында жаңа электр қуаттарын іске қосу мерзімі де кейінге шегеріліп жатыр, — деді Қасым-Жомарт Тоқаев.
Мемлекет басшысының пайымынша, Қазақстан үшін шикізаттық артықшылығын тұрақты энергетикалық және технологиялық прогреске айналдыру аса маңызды.
— Қазіргі жағдайда электр энергиясымен қамтамасыз етілу әрбір мемлекеттің бәсекеге қабілеттілігін, тіпті экономикалық егемендігін айқындайтын шешуші факторға айналды. Бүгінгі кезеңді, шын мәнінде, «электр энергиясының дәуірі» деп атауға болады. Қазақстан үшін шикізаттық артықшылығын тұрақты энергетикалық және технологиялық прогреске айналдыру аса маңызды. Ашығын айтқанда, бұл бағытта проблемалар жеткілікті, — деді Қасым-Жомарт Тоқаев.
Президент елімізде кәсіби энергетиктер саусақпен санарлық екенін де атап өтті. Ал энергетика мәселелеріне арналған форумдар мен пікірталастар жиі әрі ауқымды деңгейде өткізіледі.
