Өскемен қаласында арзан көкөніс сатылатын сауда нүктелерінің санын арттыру жоспарланып отыр. Алайда өңірлік кәсіпкерлер палатасында бағаны тұрақтандыру бағдарламасымен қала шеттері әлі де қамтылмай отырғанын атап өтті, деп хабарлайды F16.kz тілшісі.
Айта кетейік, 1 қарашадан облыс орталығындағы «Ертіс» ӘКК АҚ-ның сауда нүктелерінде және корпорацияның серіктес кейбір дүкендерінде көкөніс сату басталды.
Дегенмен, ШҚО кәсіпкерлер палатасының мәліметінше, бұл бағдарламаға «үй маңындағы дүкендердің» қатысу мәселесі әлі шешілмей тұр.
Ал шағын азық-түлік дүкендері иелерінің айтуынша, қаланың іргесіндегі елді мекендер де тұрақтандыру қорының сауда нүктелерімен қамтылмаған. Мысалы, Глубокое ауданына қарасты Ушаново ауылының тұрғындары да жергілікті дүкендерде арзан көкөністер саудаланса деген тілек айтып отыр. Бірақ кәсіпкерлердің айтуынша, белгіленген сауда үстемесі тым төмен.
– Бұл мәселе жазда да көтерілген еді, – деп атап өтті палата баспасөз қызметі. – Бизнес өкілдері тұрақтандыру қорының өнімдеріне сауда үстемесін 2%-дан 15%-ға дейін көтеруді ұсынған болатын, бұл әлеуметтік маңызы бар тауарларға рұқсат етілген деңгейге сай келеді.
«Ертіс» ӘКК өкілдері көкөніс бағасы статистикалық деректер бойынша орташа бағалар негізінде қалыптасатынын және нарықтағы бағадан 10%-ға төмен болуы керектігін түсіндірді. Сондай-ақ компания өз сауда нүктелерінің санын арттыруды жоспарлап отырғанын мәлім етті.
