ШҚО-да мектепке дейінгі білім және тәрбиемен қамтылған 2 мен 6 жас аралығындағы балалардың үлесі 99,2%-ға жетті. Бұл туралы бүгін Өңірлік коммуникациялар қызметінде өткен брифингте айтылды, деп хабарлайды F16.kz.
Облыстық білім басқармасы басшысының орынбасары Алима Ақылбекқызы мәлім еткендей, бүгінде өңірде 212 балабақша мен 176 шағын орталық жұмыс істеп тұр. Аймақта жеке инвесторлардың белсенді қатысуымен және мемлекеттік тапсырыс тетігінің арқасында балабақшамен қамтылған балалардың саны былтырғыдан сәл де болса, нақтырақ айтсақ, 0,5%-ға өскен.
– Жыл басынан бері 242 жаңа орын құрылды. Өскемен қаласы мен Зайсан ауданында 182 орындық жеке балабақшалар ашылды, сондай-ақ жұмыс істеп тұрған 60 орындық 4 балабақша кеңейтілді. Жыл соңына дейін мектепке дейінгі ұйымдарда тағы 1 257 орын құру жоспарлануда, – деп хабарлады А.Ақылбекқызы.
Оның айтуынша, 1 тамыздан мектепке дейінгі ұйымдарды жаңа оқу жылына жасақтау басталды. «Balabaqsha SmartNation» ақпараттық жүйесінде 7 615 бос орын ашылса, оның 4 813-і Өскемен қаласына тиесілі екен.
Белгілі болғандай, 2025 жылдан өңірде мемлекеттік тапсырысты ваучерлік қаржыландыру жобасы іске асырыла бастады. 1 наурыздан бастап облыс орталығының мектепке дейінгі ұйымдары ваучерлік қаржыландыруға көшті, ал қараша айынан аталмыш жобаға аудандар да қосылмақ.
Сонымен қатар, брифингте қазіргі уақытта облыстағы мектепке дейінгі ұйымдарда 3 770 педагог еңбек етіп жатқаны да белгілі болды.
