Өскеменде «Торпедо» хоккей клубы жастар командасының 19 жастағы ойыншысы Иван Пыленоктың өліміне қатысты сот отырысы басталды, деп хабарлайды F16.
Белгілі болғандай, алғашқы сот отырысы онлайн-форматта өтті, ал бірінші оффлайн отырыс биылғы 4 маусымға белгіленді.
Естеріңізге сала кетейік, «Торпедо» ХК баспасөз қызметі өткен жылдың 2 тамызында жастар командасының қақпашысы Иван Пыленоктың өзін күрт нашар сезінгенін, оған шұғыл медициналық көмек көрсетілгенін және жедел жәрдем шақырылғанын хабарлаған. Клуб таратқан ақпаратқа сенсек, көрсетілген көмекке қарамастан, жас жігіт ауруханада көз жұмған. Біраз уақыттан кейін әлеуметтік желілерде Спорт сарайы дәлізіндегі камералардың бірі түсірген бейнежазба тарады. Одан Иванның есінен танып қалмас бұрын, негізгі команданың ойыншысы, ресейлік шабуылшы Андрей Лагуновпен қақтығысып қалғанын көруге болады.
Марқұмның ата-анасы ұлының өліміне шабуылшыны кінәлап отыр. Сот шешіміне сәйкес, Андрей Лагунов істе күдікті ретінде өтуде. Оған Қылмыстық кодекстің 389-бабының 4 бөлімі (ауыр зардаптарға әкеп соққан іс-әрекет) бойынша айып тағылған. Айыпталушының кінәсі дәлелденсе, ол үш жылдан жеті жылға дейін бас бостандығынан айырылуы мүмкін.
Фото: F16.kz
