Алтай қаласында аудан тұрғындары үшін маңызды әлеуметтік нысан – магниттік-резонанстық томография (МРТ) кабинеті ашылды. Жоба мемлекетке қайтарылған активтер есебінен қаржыландырылған, деп хабарлайды F16.kz.
Жаңа МРТ кабинетінің іске қосылуы Алтай қаласы мен аудан тұрғындарына жоғары дәлдіктегі диагностикалық қызметті тұрғылықты жерінде алуға мүмкіндік береді. Бұған дейін мұндай тексеруден өту үшін өзге қалаларға баруға мәжбүр болған тұрғындар енді заманауи медициналық қызметті ауданаралық аурухананың базасында пайдалана алады. Бұл ауруларды ерте анықтап, емдеуді уақытылы бастауға және медициналық көмектің сапасын арттыруға ықпал етеді.
Ашылу рәсіміне медициналық қоғамдастық өкілдері, мемлекеттік органдардың қызметкерлері, денсаулық сақтау саласының ардагерлері және аудан тұрғындары қатысты.
Денсаулық сақтау жүйесін жаңғырту — мемлекеттік саясаттың негізгі басымдықтарының бірі. Магниттік-резонанстық томография кабинетінің ашылуы аудан тұрғындары үшін үлкен маңызға ие. Енді заманауи диагностикалық құрал-жабдықтар арқылы жоғары технологиялық медициналық көмекті өз ауданымызда да алуға болады. Айта кетейік, бүгінде мемлекетке қайтарылған қаражат әлеуметтік инфрақұрылымды дамытуға және халықтың өмір сүру сапасын арттыруға бағытталып отыр. Бұл нысан соның айқын көрінісі, — деді Алтай ауданының әкімі Ренат Құрмамбаев.
Аудан прокуроры Ержан Рыспаев өз сөзінде мемлекетке қайтарылған активтердің нақты халық игілігіне жұмсалып жатқанын атап өтті.
Ауданаралық аурухананың бас дәрігері Олжас Нүрекенов жаңа аппараттың іске қосылуы аурухананың диагностикалық мүмкіндіктерін айтарлықтай кеңейтетінін айтады. Оның пікірінше, заманауи құрылғы тексерулердің сапасы мен жеделдігін арттырып, тұрғындарға жоғары технологиялық медициналық көмекті уақытылы көрсетуге мүмкіндік береді.
Ресми бөлімнен кейін қонақтар жаңа кабинетті аралап, магниттік-резонанстық томографтың жұмысымен танысты. Мамандар құрылғының техникалық мүмкіндіктері, ауруларды ерте анықтаудағы рөлі мен диагностикалық артықшылықтары туралы жан-жақты ақпарат берді.
