Биылғы 1 мамырда Өскеменнің «Восток» стадионында жанкүйерлерді тамаша бір футбол мерекесі күтіп тұр. Бұл күні жергілікті «Алтай Өскемен» футболшылары «Ақтөбе» командасымен шеберлік байқасады, деп хабарлайды F16.kz.
Қос қарсыластың жасыл алаңдағы ойыны өз алдына, ұйымдастырушылар алқасы жанкүйерлерге арнайы бағдарлама әзірлеп отыр. Сүйікті командасын қолдауға келген өскемендіктер мен қала қонақтары сый—сияпаттан құр қалмайды бұл күні. Матч ортасындағы үзіліс кезінде көрермендерге ойын ойнатылып, жеңімпаздарға өскемендік белгілі футболшы Сергей Хижниченконың қолтаңбасы бар ойын жейдесі, маусымның кәсіби футбол добы, арнайы шарфтар мен қақпашы қолғаптары, DoDo Pizza-ның сыйлығы, Ayax спорттық дүкенінің сертификаттары және басқа да көптеген сыйлық беріледі.
Бірінші лиганың 4-ші турында кездесетін «Алтай Өскемен» және «Ақтөбе» командалары арасындағы матч 1 мамыр, жұма күні сағат 14.00-де облыс орталығындағы «Восток» стадионында өтеді.
Естеріңізге сала кетейік, жергілікті «Алтай Өскемен» ойыншылары Бірінші лига аясында осыған дейін үш тур өткізіп, 4 ұпай еншіледі. Алғашқы турда өскемендік ұжым «Оңтүстік Академиясын» 2:0 есебімен жеңсе, екінші турда «Екібастұзбен» тең тарқасып, бір ұпайды місе тұтты. Үшінші турда Әулиеата жеріне қонаққа барған «алтайлықтар» жергілікті «Тараздан» 3:0 есебімен жеңіліп қалды.
Фото:birinshiliga/instagram
