Шығыс Қазақстан облысы Зайсан ауданының Біржан ауылдық округіне қарасты Ақарал ауылында Beeline сауда белгісі «Кар-Тел» ЖШС-нің ұялы байланыс базалық станциясының іске қосылды, деп хабарлайды F16.kz.
Бұл – Президенттің қала мен аудан орталықтарын ғана емес, шалғай ауылдарды да кең жолақты интернетпен қамтамасыз ету жөніндегі тапсырмасын іске асыру бағытында атқарылып жатқан жұмыстың бірі.
Байланыс операторы мен Шығыс Қазақстан облысы әкімдігінің бірлескен жұмысының нәтижесінде Ақаралда «Кар-Тел» операторының желісі іске қосылды.
Жобаның негізгі мақсаты — ауыл тұрғындарын сапалы мобильді байланыспен және жоғары жылдамдықты интернетпен қамтамасыз ету.
Бұл бастама цифрлық теңсіздікті азайтып, шалғайдағы ауыл халқының заманауи телекоммуникациялық қызметтерге қол жеткізуін арттыра түседі.
Ауыл тұрғындары жаңа базалық станцияның артықшылықтарын бірден сезіне бастағандарын жеткізді.
Бұл ауылда 70 жылдан бері тұрып келеміз. Бұрын байланыс болған жоқ. Ол заманда жай ғана стационар телефондар орнатылды, ал ұялы байланыс деген мүлде жоқ еді. Қазір заман дамыды, жаңа технологиялар ауылға да жетті. Енді алыстағы туған-туыстармен емін-еркін сөйлесіп, хал-жағдайын біліп отырамыз. Бұрынғыдай қиналмай, кез келген уақытта хабарласа алатынымызға қуаныштымыз, — деді ауыл тұрғындары.
Ақаралда орнатылған жаңа байланыс — тек технология жетістігі емес, ауылдың тынысын кеңейткен, адам мен адамды жақындастырған игілікті қадам. Бұл әсіресе, болашаққа үмітпен қарайтын жастарға, кәсіп іздеген еңбеккерлерге және күн сайын халықпен жұмыс істейтін ұстаздар мен дәрігерлерге үлкен демеу.
