Көктемгі су тасқынының екінші толқыны жүруіне байланысты Үлбі өзенінің деңгейі көтерілді. Тұрғындардың қауіпсіздігін қамтамасыз ету және төтенше жағдайлардың алдын алу мақсатында Өскемендегі көпір асты өткелдерінде көлік қозғалысы уақытша тоқтатылды, деп хабарлайды F16.kz.
Атап айтқанда, Б.Александров атындағы спорт сарайының маңындағы Үлбі көпірінің астымен өтетін, яғни Астана және Протозанов көшелерін бойлап жүретін өткелдерде көлік қозғалысына шектеу қойылды.
Сондай—ақ Шәкәрім даңғылының бойында орналасқан көпірдің астынан өтетін көлік жолы да уақытша жабылды.
Су деңгейін бақылау жұмыстары үздіксіз жүргізіліп, тиісті шаралар қолға алынған. Уақытша шектеулер жағдай толық тұрақталғанға дейін сақталады.
Кептелістер мен қолайсыздықтар болмас үшін, өз бағыттарыңызды алдын ала жоспарлауды сұраймыз, – деп жазды Өскемен қаласының әкімдігі әлеуметтік желідегі ресми парақшасында.
Фото: Өскемен қаласының әкімдігі
