Өскеменде қала әкімінің кубогына арналған республикалық Жайдарман ойындары өтті, деп хабарлайды F16.kz тілшісі. Көңілді тапқырлардың сайысында барлығы 10 команда бақ сынасты. Олардың арасында Астана мен Павлодардан, көрші Абай облысынан келген құрамалар да болды.
Ойын басында Шығыс Қазақстан облысы прокурорының орынбасары Ерлан Бұланбаев сөз алып, жайдарманшыларға сәттілік тіледі. Сондай-ақ, облыстық прокуратураның атынан арнайы номинацияға жүлде тігілгенін атап өтті.
Тартысты сайыс бір ғана сәлемдесу кезеңінен тұрды. Ойыншылар түрлі өзекті тақырыптарды, Өскеменнің ерекшеліктерін әзілмен жеткізіп, көрерменді күлкіге қарық қылды.
Ойынды рахаттанып көрдік, бір жасап қалдық. Өскеменнің төріне келген барша қонақ командаға алғыс айтамыз. Жастарға жан-жақты қолдау жалғаса берсін, – деді қазылар алқасының мүшесі Еркін Қуаныш.
Ойын нәтижесінде, бірінші орынды Аягөзден келген «Жастық шақ», екінші орынды «Әуезов құрамасы» (Семей), үшінші орынды С.Аманжолов атындағы ШҚУ-дың «Көркем» командасы иеленді. «Үздік ойыншы» аталымын астаналық «Сейфуллин» командасының өкілі, ал «Үздік әзіл» аталымын павлодарлық «Андриановка» құрамасы жеңіп алды. Телевизиялық ойындарда Шығыстың атын шығарып жүрген «Нұр Зайсан» командасы «Көрермен көзайымы» атанды. Жеңімпаздарға ақшалай жүлделерді қала әкімінің кеңесшісі Болатбек Мамарбаев табыстады.
