ШҚО-да сүт өңдеу саласы қарқынды дамып келеді. Өңірде сүт өңдейтін кәсіпорындар салу мен жаңғыртуға арналған жаңа жобалар қолға алынып жатыр. Оның бірі – облыс орталығында салынып жатқан заманауи сүт өңдеу зауыты, деп хабарлайды F16.kz.
Кәсіпорынның өндірістік қуаты тәулігіне 200 тонна, яғни жылына шамамен 73 мың тонна сүт өңдеуге мүмкіндік береді. Жобаның жалпы құны – 5 млрд теңге. Зауытта 700-ге жуық жаңа жұмыс орнын ашу жоспарланып отыр.
Кәсіпорында сүт, қышқыл сүт өнімдері, сүзбе, жұмсақ және балқытылған ірімшіктер, йогурт, қаймақ сияқты өнімдердің кең ассортименті шығарылмақ. Жаңа өндірістік кешен заманауи өңдеу және автоматтандыру технологияларын енгізуге, өндіріс көлемін едәуір арттыруға мүмкіндік береді.
Сонымен қатар аймақта өзге де жаңа кәсіпорындар іске қосылып жатыр. Мәселен, Шемонаиха қаласында «Сивер Плюс» ЖШС-нің заманауи сүт өңдеу зауыты өз жұмысын бастады. Кәсіпорын озық құрал-жабдықтармен жабдықталған және «Nastole» брендімен кефир, сүзбе, сүт пен қаймақ өндіреді. Қазіргі таңда зауыт тәулігіне 6 тоннаға дейін сүт өңдейді және алдағы уақытта жобалық қуатына шығу жоспарланып отыр.
Өндіріс жергілікті шаруа қожалықтарымен тығыз әріптестік орнатқан. Мамандардың айтуынша, сүтті жергілікті жерде өңдеу өндірістерін дамыту Шығыс Қазақстан үшін аса маңызды. Жаңа кәсіпорындар өңірде өндірілетін шикізатты тиімді пайдалануға, өнім түрлерін көбейтуге және тұрғындарды сапалы отандық өніммен қамтамасыз етуге жол ашады.
