Ақтөбеде ҚР Қарулы күштері Құрлық әскерлерінің мергендері арасында республикалық жарыс өтті. Жарыс Кеңес одағының Батыры Әлия Молдағұлованың 100 жылдық мерейтойына арналды, деп хабарлайды F16.kz.
Додаға Құрлық әскерлерінің құрамалары мен әскери бөлімдердің командалар қатысып, өзара мықтыны анықтады. Сайыс бағдарламасы түрлі қашықтықтардағы нысаналарды жою, күндізгі және түнгі атыс, шектеулі көріну жағдайларында тапсырмаларды орындау және бүркемелеу құралдарын қолдануды қамтыды.
– Бұл жарыстар мергендердің жауынгерлік шеберлігін арттырып, жеке және топтық жұмыс дағдыларын жетілдіруге бағытталған. Бұл спорт түрі мергеннен жоғары физикалық дайындықты, психологиялық төзімділікті және өзгермелі жағдайларға жедел бейімделу қабілетін талап етеді, – деп атап өтті Құрлық әскерлері бас қолбасшысы басқармасының жауынгерлік дайындық бас басқармасы бөлімшесінің бастығы, полковник Жасұлан Мусин.
Тартысты өткен сайыс нәтижесінде бірінші орынды Ақтөбе гарнизонындағы №30238 әскери бөлімінің командасы жеңіп алса, екінші орынға Өскемен гарнизонының №27943 әскери бөлімінің құрамасы тұрақтады. Ал үшінші орынды Аягөз гарнизонының №10810 әскери бөлімінің мергендері иеленді.
Жеңімпаз команда Құрлық әскерлері атынан ҚР Қарулы күштері деңгейіндегі жарыстарға қатысатынын айту керек.
