Өскеменде жайлы орта қалыптастыру және спортты дамыту мақсатында бес ірі нысан салу жоспарланып отыр, деп хабарлайды F16.kz.
Атап айтқанда, қаланың сол жағалауындағы Есу каналын абаттандыру, ипподром, Жақсылық Үшкемпіров көшесіндегі жабық шағын футбол алаңы, учаскелік полиция пункті және республикалық үстел теннисі академиясының көпфункционалды спорт кешенінің құрылыстары жүргізілмек.
Бұған қоса екі әлеуметтік нысан салынып жатыр. Олар: 142 орындық гематология орталығы (жалпы ауданы 31,3 шаршы метр) және 25 адам қабылдайтын дәрігерлік амбулатория (ауданы 558,57 мың шаршы метр).
Бұған қоса алты әлеуметтік нысанның құрылысын жүргізу көзделген. Олар: волейбол орталығы, «Алтай арена», оқушылар сарайы, жатақханасы бар лицей және екі жалпы білім беретін мектеп.
Инженерлік-коммуникациялық инфрақұрылымды дамыту аясында төрт нысанның жобалық-сметалық құжаттамасы әзірленіп жатыр. Бұл жобаларға аула ішіндегі жолдардың және екі бірдей магистральді электрмен қамту желісінің құрылысы кіреді. Қазір магистральді электр желілерінің құрылысы басталған, бұл қаладағы электр қуаты тапшылығын шешуге мүмкіндік береді.
Облыс орталығында спорт инфрақұрылымын ауқымды жаңарту жұмыстары жалғасады. Жоспарға сәйкес, Добролюбов көшесі, 44 мекен жайындағы бассейн жөндеуден өтеді, 19 ауланың спорт алаңдары жаңғыртылады, 22-ші және 23-ші шағын аудандарда демалыс аймақтары қайта құрылады.
ИППОДРОМНЫҢ ҚҰРЫЛЫСЫ БАСТАЛАДЫ
Шаһар басшысының айтуынша, Комсомол аралында салынатын жабық шағын футбол алаңы жыл он екі ай турнирлер мен жаттығулар өткізуге мүмкіндік береді. Бұл әсіресе қысы ұзақ өңір үшін маңызды. Жаңа стадионның жалпы ауданы – 1430,4 шаршы метр.
Тағы бір айта кетер жайт, Үстел теннисі академиясының кәсіби спортшыларды даярлау орталығы болумен қатар ерекше қажеттіліктері бар адамдар үшін де жаттығу алаңына айналуы. Қазір мұнда денсаулығын шынықтырып, салауатты өмір салтын серік етіп жүрген ерекше жандар жетерлік.
Бұл жобалардың бәрі қазір қарастырылып жатыр және инвестициялық сипатқа ие. Оларды жүзеге асыру кезінде жаңа жұмыс орындары ашылатынын атап өткен абзал.
Фото: shqfl.kz
