Шығыс Қазақстан облыстық филармониясында медицина қызметкерлері күніне орайластырылған «Шығыс медицинасы-2025. Негізділік. Жаңару. Жауапкершілік» тақырыбындағы салтанатты іс-шара өтті. Іс-шара барысында медицина саласының мамандарын облыс әкімі Нұрымбет Сақтағанов құттықтады, деп хабарлайды F16.kz.
– Қадірлі медицина саласының қызметкерлері мен ардагерлері! Баршаңызды кәсіби мерекелеріңізбен құттықтаймын! Сіздердің әрбір күніңіз халыққа қалтқысыз қызмет көрсетудің, зор жігер мен махаббаттың белгісі. Сіздер әрдайым азаматтардың денсаулығы мен өмірі үшін күресесіздер. Денсаулық сақтау жүйесінің дамуы – мемлекеттік саясаттың негізгі басымдықтарының бірі. Медицина – қарқынды дамып келе жатқан сала, және медицинадағы соңғы жетістіктер халық игілігі үшін пайдаланылып, медицина қызметкерлеріне жетуі қажет. Бүгінде медицина қызметкерінен тек жанқиярлық және кәсіби шеберлік ғана емес, сонымен қатар тұрақты даму, медицинадағы соңғы жетістіктерді меңгеру және жаңа технологияларды енгізу де талап етілуде. Шығыс Қазақстан облысында, соның ішінде ауылдық жерлерде емдеу мекемелерінің кең жүйесі қалыптасқан. Соңғы жылдары денсаулық сақтау нысандарын жөндеу, жабдықтау және құрылысын жүргізу жүйелі атқарылуда. «Ауылдағы денсаулық сақтауды жетілдіру» ұлттық жобасы аясында 35 денсаулық сақтау нысаны пайдалануға берілді, – деді Нұрымбет Сақтағанов.
ШҚО әкімі аппаратының баспасөз қызметінен хабарлағандай, қазіргі уақытта облыста медицина саласына қатысы бар бірнеше нысанның құрылыс жұмыстары жүріп жатыр. Олардың арасында Өскемендегі гематология орталығы, 200 төсек-орындық көпсалалы аурухана мен Риддер қаласындағы 500 келушіге арналған емхана бар. Сонымен қатар, облыстық көпсалалы онкология және хирургия орталығының хирургиялық корпусындағы 1-3 қабат бөлімшелерін жаңғырту, қайта жоспарлап, жабдықтау, Ана мен бала орталығы стационарының ғимаратын перинаталдық орталыққа ауыстыру жұмыстары жүргізілуде. Жақында Қасым Қайсенов кентінде 150 келушіге арналған емхана пайдаланылуға берілгенін айту керек.
Салтанатты жиын барысында аймақ басшысы медицина саласының үздік қызметкерлеріне Денсаулық сақтау министрінің Құрмет грамоталары мен төсбелгілерін, сондай-ақ облыс әкімінің грамоталары мен алғыс хаттарын табыстады.
Сонымен қатар, еңбек сіңірген медицина қызметкерлеріне «Сенім» республикалық қоғамдық бірлестігінің «Үздік» төсбелгілері берілді.
Іс-шара мерекелік концертпен және естелік суретке түсумен аяқталды.
