Облыс орталығында 5 қарашадан бастап «Тасымалдаушы» жедел-профилактикалық іс-шарасы өтіп жатыр, деп хабарлайды F16.kz.
Шараның мақсаты – жол-көлік оқиғаларының алдын алу, жолаушылар тасымалына бақылауды күшейту, жеке тұлғалардың жолаушылар мен жүкті заңсыз тасымалдау фактілерін анықтау.
«Тасымалдаушы» жедел-профилактикалық іс-шарасы барысында автобустардың техникалық жағдайы және жүргізушілердің қажетті құжаттарының болуы назарға алынады, – делінген Өскемен қаласы полиция басқармасының хабарламасында.
Естеріңізге сала кетейік, 4 қараша күні Өскемен – Риддер автожолының 48-шақырымында ЗИЛ мен Toyota Estima көліктері соқтығысты. Кейін белгілі болғандай, заңсыз такси жүргізушісі жолаушыларымен бірге Өскемен қаласына бағыт алған. Жеңіл көліктің жүргізушісі мен төрт жолаушысы оқиға орнында көз жұмды. Бір адам жарақат алып, медициналық мекемеге жеткізілді.
