Риддер қаласында қазақ тілінде білім беретін “Шаңырақ” көпсалалы мектеп-гимназиясы қолданысқа берілді, деп хабарлайды F16.kz.
«Казцинк» ЖШС жеке қаражаты есебінен салған жаңа білім ордасы 600 оқушыға арналған. Салтанатты ашылу рәсіміне Шығыс Қазақстан облысының әкімі Нұрымбет Сақтағанов қатысты
Ауқымды әлеуметтік жоба қаланың 5-ші шағына ауданында жүзеге асырылды. Жаңа білім ордасының жалпы аумағы 10 мың шаршы метрден асады. Үш блокты ғимарат қауіпсіздік пен жайлылықтың озық стандарттарына қатаң сәйкес жобаланып, жабдықталған.
Биыл облысымызда 10 мыңға жуық жас бүлдіршін мектеп табалдырығын алғаш аттап отыр. Оның 60-тан астамы осы Шаңырақ мектебіне қабылданды. Жаңа оқу жылында шекаралық аймақ саналатын Марқакөл ауданы, жаңадан құрылған Самар ауданы және өндірісі қуатты Риддер қаласында үш жаңа мектеп пайдалануға берілді. 600 орындық заманауи «Шаңырақ» мектеп-гимназиясы – келешекте білім мен инновацияның көшін бастап, еліміздің білімді, бәсекеге қабілетті жастарын тәрбиелейтін іргелі білім ордасына айналсын, — деді аймақ басшысы.
Білім ордасында оқушылардың сапалы білім алуы және шығармашылық тұрғыда дамуы үшін барлық жағдай жасалған. Атап айтқанда 5-11 сыныптарға арналған кең оқу кабинеттері, мамандандырылған шеберханалар, заманауи кітапхана, ресурс орталығы, бастауыш сыныптарға арналған толығымен оқшауланған және қауіпсіз оқу аймағы бар. Ғимаратта үлкен және кіші спорт залдары, 135 орындық акт залы, толыққанды медициналық блок, логопед пен психолог кабинеттері қарастырылған.
Балалардың сапалы тамақтануына ерекше назар аударылып, заманауи асхана жабдықталған. Мектептің іргелес аумағы да көпфункционалды спорттық-ойын алаңына айналды. Мұнда футбол, волейбол және баскетбол ойнауға арналған заманауи алаңдар, кәсіби 250 метрлік жүгіру жолағы, әртүрлі жас тобындағы балаларға арналған жайлы ойын және демалыс аймақтары жабдықталған.
Жаңа мектептің пайдалануға берілуі қаланың білім беру инфрақұрылымын дамытуға қуатты серпін беріп, өскелең ұрпақ үшін қолайлы, технологиялық орта қалыптастырады.
