Шемонаиха қаласында 300 орындық жаңа мекиеп қолданысқа берілді, деп хабарлайды F16.kz.
Заманауи білім ордасы Мемлекет басшысының тапсырмасымен жүзеге асырылып жатқан «Келешек мектебі» ұлттық жобасы аясында салынған.
Жаңа мектеп физика, химия, биология, математика, информатика, тілдер мен музыка пәндерінің кабениеті интерактивті панельдермен жабдықталған. Оқушылардың инженерлік-техникалық дағдыларын дамыту мақсатында STEM-зертханалар, робототехника кабинеті және Д. Серікбаев атындағы ШҚТУ-дың инженерлік сыныбы ашылған.
Мектеп оқушыларының кәсіби бағытталуын қамтамасыз ету үшін аспаздық, тігін, ағаш өңдеу шеберханалары мен IT-студия жұмыс істейді.
Осы орайда инклюзивті білім беру де назардан тыс қалмады. Мектепте логопед, психолог, дефектолог кабинеттері, сенсорлық бөлмелер және арнайы білім беруді қажет ететін балалармен жұмыс істеуге арналған С. Аманжолов атындағы ШҚУ қолдауымен ашылған «Danabala» кабинеті бар.
Мектеп инфрақұрылымына демалыс аймақтары, коворкинг, кітапхана, оқу залы, акт және хореография залдары кіреді.
Оқушылардың қауіпсіздігін қамтамасыз ету үшін бейнебақылау жүйесі, кіруді бақылау, жеке шкафтар, лифт, пандус және тактильді белгілер орнатылған.
«Келешек мектебі» ұлттық жобасы аясында бой көтерген мектеп балалардың жан-жақты дамуына жағдай жасап, сапалы білім беруді көздейді.
Фото: ШҚО әкімінің баспасөз қызметі
