ҚР Премьер—министрінің орынбасары – ұлттық экономика министрі Серік Жұманғарин 2026–2035 жылдарға арналған ұзақ мерзімді даму болжамын ұсынды, деп хабарлайды F16.kz.
Құжатта елдің алдағы жылдарға арналған даму бағыттары үш түрлі сценарий бойынша қарастырылған: базалық, орташа және баламалы нұсқалар.
Алдағы 10 жылда ел экономикасының орташа өсімі баламалы сценарий бойынша – 5,1 %, орташа – 4,3 %, ал базалық болжам бойынша – 4,5 % деңгейінде болмақ. 2035 жылға қарай номиналды ЖІӨ 473,2 трлн теңгеге дейін өседі деп болжанған. Ал мемлекеттік бюджеттің кірістері сол жылы 66,8 трлн теңгеге дейін ұлғаяды, – деді министр.
2029 жылдан бастап Ұлттық қордан берілетін кепілдендірілген трансферт көлемін 2 триллион теңгеге дейін азайту көзделіп отыр. Сонымен қатар бюджет тапшылығын кезең-кезеңімен қысқарту жоспарланған. 2029 жылы оның көлемі ЖІӨ-нің 0,4 %-ына дейін төмендейді. Ал 2030 жылдан бастап бюджеттің теңгерімді болуы, яғни тапшылықсыз қалыптасуы жоспарланған.
Экономикалық және бюджеттік болжамдарға сәйкес, мемлекеттік бағдарламаларды қаржыландырудың жалпы көлемі республикалық және жергілікті бюджеттер есебінен мынадай болмақ:
2026 жылы — 37,4 трлн теңге,
2027 жылы — 39,6 трлн теңге,
2028 жылы — 41,6 трлн теңге.
Сондай-ақ болжам бойынша Ұлттық қордың таза валюталық активтері 2026 жылы 60,8 млрд доллар көлемінде болса, 2035 жылы 109,9 млрд долларға дейін өспек.
